റാന്നി : അഡ്വ പ്രമോദ് നാരായൺ എംഎൽഎയുടെ അഭ്യർത്ഥനയുടെ ഫലമായി റാന്നി താലൂക്കാശുപത്രിക്ക് ഫോമയുടെ പോർട്ടബിൾ വെന്റിലേറ്റർ. അമേരിക്ക കേന്ദ്രമാക്കി പ്രവർത്തിക്കുന്ന ഫെഡറേഷൻ ഓഫ് മലയാളി അസോസിയേഷൻ ഓഫ് അമേരിക്ക (ഫോമ) പ്രസിഡൻറ് അനിയൻ ജോർജ്, ജനറൽ സെക്രട്ടറി ഉണ്ണികൃഷ്ണൻ എന്നിവരോടാണ് മലയോര മേഖലയിലെ പാവപ്പെട്ടവരുടെ ഏക ആശ്രയമായ റാന്നി താലൂക്ക് ആശുപത്രിക്ക് ഒരു വെന്റിലേറ്റർ നൽകണമെന്ന് എംഎൽഎ ആവശ്യപ്പെട്ടത്. ഇത് പ്രകാരമാണ് പുതിയ വെൻറിലേറ്റർ ലഭിച്ചത്. നിലവിൽ മൂന്ന് വെൻറിലേറ്ററുകൾ റാന്നി താലൂക്ക് ആശുപത്രിക്ക് ഉണ്ടെങ്കിലും ഇവ ഐസിയുവിൽ തന്നെ സ്ഥിരം സംവിധാനമായി ഉപയോഗിക്കാനെ കഴിയൂ.
ഇപ്പോൾ ലഭിച്ചിരിക്കുന്ന വെന്റിലേറ്റർ യൂണിറ്റ് എവിടേക്കും മാറ്റാനാകും. ഉപയോഗിക്കാനുള്ള സ്ഥലവും വളരെ പരിമിതമായി മതി. മെഡിക്കൽ കോളേജിലേക്ക് രോഗികളെ കൊണ്ടുപോകുമ്പോൾ ആംബുലൻസിൽ ഉപയോഗിക്കുന്നതിനും വാർഡിൽ തന്നെ വെൻറിലേറ്ററിന്റെ ആവശ്യം പെട്ടെന്ന് ഉണ്ടാവുകയാണെങ്കിലും എല്ലാം വെൻറിലേറ്റർ എത്തിച്ച് നടത്താനാകും എന്നതാണ് ഇതിന്റെ പ്രത്യേകത.