ഷൊര്‍ണൂര്‍ : ഷൊര്‍ണൂര്‍ കേരളീയ ആയുര്‍വേദ സമാജം ആശുപത്രിയിലേക്ക് കോണ്‍ഗ്രസ് നടത്തിയ മാര്‍ച്ചില്‍ സംഘര്‍ഷം. കോണ്‍ഗ്രസ് മണ്ഡലം കമ്മിറ്റിയുടെ ആഭിമുഖ്യത്തില്‍ നടത്തിയ മാര്‍ച്ചാണ് സംഘര്‍ഷത്തില്‍ കലാശിച്ചത്. ആശുപത്രിയിലേക്ക് തള്ളിക്കയറാന്‍ കോണ്‍ഗ്രസ് പ്രവര്‍ത്തകര്‍ ശ്രമിച്ചതോടെ പോലീസുമായി ഉന്തും തള്ളുമുണ്ടായി. തെരഞ്ഞെടുക്കപ്പെട്ട ഭരണ സമിതിയുടെ കീഴില്‍ പ്രവര്‍ത്തിക്കുന്ന ആശുപത്രി സ്വകാര്യ ട്രസ്റ്റിന് കൈമാറി ഭരണ സമിതിയിലെ ഒരുവിഭാഗം കോടികള്‍ കൈക്കലാക്കാനുള്ള നീക്കത്തിനെതിരെയാണ് സമരമെന്ന് ഉദ്ഘാടനം ചെയ്ത കെ.പി.സി.സി നിര്‍വാഹക സമിതിയംഗം സി.വി ബാലചന്ദ്രന്‍ പറഞ്ഞു.
കെ.എ സമാജം ഡയറക്ടറും നഗരസഭ സ്ഥിരം സമിതി ചെയര്‍മാനുമായ കെ.കൃഷ്ണകുമാര്‍ അധ്യക്ഷത വഹിച്ചു. ഡി.സി.സി സെക്രട്ടറിമാരായ ടി.കെ ഹമീദ്, ഷൊര്‍ണൂര്‍ വിജയന്‍, ടി.വൈ ഷിഹാബുദ്ദീന്‍, യൂത്ത് കോണ്‍ഗ്രസ് ജില്ല പ്രസിഡന്റ് ടി.എച്ച്‌ ഫിറോസ് ബാബു തുടങ്ങിയവര്‍ മാര്‍ച്ചിന് നേതൃത്വം നല്‍കി.
