കൊല്ലം: പഴകിയ മീനിന് പുറമേ ഇതര സംസ്ഥാനങ്ങളില്‍ നിന്ന് പഴകിയ മാംസവും അതിര്‍ത്തി കടന്നെത്തുന്നു. ഇതോടെ അതിര്‍ത്തി ചെക് പോസ്റ്റുകളില്‍ പരിശോധന ശക്തമാക്കി. രോഗം ബാധിച്ച കന്നുകാലികളുടേയും ചത്ത മൃഗങ്ങളുടേയും ഇറച്ചിയാണ് കുറഞ്ഞ വിലയ്ക്ക് ഇതര സംസ്ഥാനങ്ങളില്‍ നിന്നും എത്തുന്നത്. ഇവ ഭക്ഷ്യയോഗ്യമല്ല. ബലിപ്പെരുന്നാള്‍ അടുത്തതോടെ അതിര്‍ത്തികള്‍ക്ക് പുറമേ ഇറച്ചി വില്‍പ്പന കേന്ദ്രങ്ങളിലും പരിശോധന നടത്താന്‍ ഒരുങ്ങുകയാണ് ഭക്ഷ്യസുരക്ഷ വകുപ്പ്.
ട്രോളിംഗ് തുടങ്ങിയതിന് ശേഷം കൊല്ലം ജില്ലയില്‍ മാത്രം പതിനായിരം കിലോ മീനാണ് ഫുഡ് സേഫ്റ്റി ഡിപ്പാര്‍ട്‌മെന്റ് പിടിച്ചെടുത്തത്. തമിഴ്‌നാട്, ആന്ധ്രാപ്രദേശ്, ഗുജറാത്ത്, മഹാരാഷ്ട്ര എന്നീ സംസ്ഥാനങ്ങളില്‍ നിന്നാണ് കേരളത്തിലേക്ക് പഴകിയ മീനെത്തുന്നത്. മീനിന്റെ ലഭ്യതക്കുറവ് മുതലെടുത്താണ് ഇത്തരം സംഘങ്ങള്‍ വ്യാപകമായി പ്രവര്‍ത്തിക്കുന്നതെന്നാണ് വിലയിരുത്തല്‍. കഴിഞ്ഞ ഒരു മാസത്തിനുള്ളില്‍ കൊല്ലം ജില്ലയില്‍ മാത്രം പതിനായിരം കിലോ പഴകിയ മീനാണ് ഭക്ഷ്യസുരക്ഷ വിഭാഗം പിടികൂടി നശിപ്പിച്ചത്.
