ഡൽഹി: ഐപിഎൽ 2026-ൽ ഗുജറാത്ത് ടൈറ്റൻസിനെതിരായ റോയൽ ചലഞ്ചേഴ്സ് ബെംഗളൂരുവിന്റെ തകർപ്പൻ വിജയത്തിന് പിന്നാലെ വിരാട് കോഹ്ലിയും മുഹമ്മദ് സിറാജും തമ്മിലുള്ള വൈകാരിക നിമിഷം സോഷ്യൽ മീഡിയയിൽ തരംഗമാകുന്നു. ചിന്നസ്വാമി സ്റ്റേഡിയത്തിൽ നടന്ന ആവേശകരമായ മത്സരത്തിന് ശേഷം സിറാജ് പുറകിലൂടെ വന്ന് കോഹ്ലിയെ കെട്ടിപ്പിടിക്കുന്ന ദൃശ്യങ്ങൾ ആരാധകരുടെ ഹൃദയം കവർന്നു. വർഷങ്ങളോളം ഒരേ ടീമിൽ ഒരുമിച്ച് കളിച്ച ഇരുവരും തമ്മിലുള്ള ആഴത്തിലുള്ള സൗഹൃദത്തിന്റെ തെളിവായിരുന്നു ആ നിമിഷം.
2025 സീസണിന് മുന്നോടിയായാണ് സിറാജ് ആർസിബി വിട്ട് ഗുജറാത്ത് ടൈറ്റൻസിലേക്ക് ചേക്കേറിയത്. ഇന്ത്യയിലെ മുൻനിര ഫാസ്റ്റ് ബൗളർമാരിൽ ഒരാളായി സിറാജിനെ വളർത്തിയെടുത്തതിൽ ആർസിബിക്കും പ്രത്യേകിച്ച് വിരാട് കോഹ്ലിക്കും വലിയ പങ്കുണ്ട്. കരിയറിന്റെ തുടക്കത്തിൽ ‘ചെണ്ട സിറാജ്’ എന്ന പരിഹാസം നേരിട്ടപ്പോഴും സിറാജിനെ ചേർത്തുപിടിക്കുകയും പിന്തുണയ്ക്കുകയും ചെയ്തത് അന്നത്തെ ക്യാപ്റ്റനായിരുന്ന വിരാട് ആയിരുന്നു. കഴിഞ്ഞ സീസണിൽ കോഹ്ലിക്കെതിരെ ആദ്യ പന്ത് എറിയാൻ സിറാജ് ബുദ്ധിമുട്ടുന്ന ദൃശ്യങ്ങൾ മുൻപ് വൈറലായിരുന്നു.
മത്സരത്തിൽ ഗുജറാത്ത് ഉയർത്തിയ 206 റൺസ് എന്ന വിജയലക്ഷ്യം അഞ്ച് വിക്കറ്റ് ബാക്കിനിൽക്കെയാണ് ആർസിബി മറികടന്നത്. 44 പന്തിൽ 81 റൺസെടുത്ത വിരാട് കോഹ്ലിയാണ് ബെംഗളൂരുവിന്റെ വിജയശിൽപി. രണ്ടാം വിക്കറ്റിൽ ദേവ്ദത്ത് പടിക്കലുമായി (27 പന്തിൽ 55 റൺസ്) ചേർന്ന് കോഹ്ലി 115 റൺസിന്റെ മികച്ച കൂട്ടുകെട്ടുണ്ടാക്കി. ഇടയ്ക്ക് ചില വിക്കറ്റുകൾ വീണെങ്കിലും ഏഴ് പന്തുകൾ ബാക്കിനിൽക്കെ ആർസിബി ആധികാരികമായി ലക്ഷ്യത്തിലെത്തി.
