പത്തനംതിട്ട : വോട്ട് ചെയ്യാന് ബംഗാളികളും തമിഴ്നാട്കാരും നാട്ടിലേക്ക് വണ്ടി കയറിയതോടെ പത്തനംതിട്ട ജില്ലയിലെ ഹോട്ടലുകളും നിര്മ്മാണ മേഖലയും സ്തംഭിച്ചു. ഹോട്ടലുകള് ചിലത് പൂര്ണ്ണമായും അടച്ചു. 29 നാണ് ബംഗാളിലെ നിയമസഭാ തിരഞ്ഞെടുപ്പ്. 23 ന് തമിഴ്നാട്ടിലെ വോട്ടിംഗ് കഴിഞ്ഞുവെങ്കിലും തൊഴിലാളികളില് ഭൂരിഭാഗവും തിരികെ എത്തിയിട്ടില്ല. ജില്ലയില് ഗ്യാസ് സിലണ്ടര് ക്ഷാമം രൂക്ഷമായപ്പോള് തമിഴ്നാട് സ്വദേശികള് നടത്തുന്ന ചെറിയ ചായകടകളില് ചായ ലഭിച്ചതായിരുന്നു പലര്ക്കും ആശ്വാസമായത്. ഇവര് നാട്ടില് പോയപ്പോള് സജീവമായി പ്രവര്ത്തിച്ചിരുന്ന പല കടകളും താത്കാലികമായി പൂട്ടിയത് മൂലം ചായയും ചെറുകടിയും ഇപ്പോള് കിട്ടാനില്ല.
ജില്ലയിലെ നിര്മ്മാണ പ്രവര്ത്തനങ്ങള് പലതും നിലച്ചുകഴിഞ്ഞു. പൊതുമരാമത്ത് വകുപ്പ് തുടങ്ങി വെച്ച പല നിര്മ്മാണ പ്രവര്ത്തികളും തൊഴിലാളികള് ഇല്ലാതെ വന്നതോടെ നിര്ത്തി വെച്ചിരിക്കുകയാണ്. ഇവര് തിരികെ എത്തിയെങ്കില് മാത്രമേ പല പദ്ധതികളുടെയും നിര്മ്മാണം പുനരാരംഭിക്കുവാന് കഴിയൂ. പത്തനംതിട്ട ജില്ലാ ആസ്ഥാനത്ത് നഗര സൗന്ദര്യവത്കരണ പ്രവര്ത്തനങ്ങളും പൂര്ണ്ണമായി നിലച്ചു. നാട്ടിലേക്ക് പോയ ഇതര സംസ്ഥാന തൊഴിലാളികള് മടങ്ങിയെത്തി നിര്മ്മാണ പ്രവര്ത്തികള് പുനരാരംഭിക്കുന്നത് കാത്തിരിക്കുകയാണ് പത്തനംതിട്ട ജില്ല.
