ഇടുക്കി: ഇടുക്കിയിൽ ശക്തമായ മഴ തുടരുന്നു. മൂന്നാറിൽ കനത്ത മഴയെ തുടർന്ന് നിർമാണത്തിലിരുന്ന കെട്ടിടം ഇടിഞ്ഞുതാഴ്ന്നു. ചിന്നക്കനാൽ പവർ ഹൗസ് വെള്ളച്ചാട്ടത്തിന് സമാപത്തായി നിർമ്മാണം നടന്നുവന്നിരുന്ന കെട്ടിടമാണ് അപകടാവസ്ഥയിൽ ആയത്. ഇതോടെ സമീപത്ത് താമസിക്കുന്ന പതിനഞ്ചോളം കുടുംബങ്ങൾ ആശങ്കയിലാണ്. റെഡ് സോണിൽ ഉൾപ്പെടുന്ന പ്രദേശമാണിത്. കുന്ന് ഇടിച്ചുനിരത്തിയും മണ്ണ് നീക്കം ചെയ്തുമാണ് നിർമ്മണം നടന്നത്. റെഡ് സോണിൽ നിർമാണത്തിന് അനുമതി നൽകിയതാണ് അപകടാവസ്ഥയ്ക്ക് കാരണമെന്ന വിമർശനവും ഉയരുന്നുണ്ട്.
മഴ സാധ്യതയെത്തുടര്ന്നു ഇടുക്കി ജില്ലയില് ഇന്ന് കേന്ദ്ര കാലാവസ്ഥാ വകുപ്പ് റെഡ് അലേര്ട്ട് പ്രഖ്യാപിച്ചതായി ജില്ലാ ദുരന്തനിവാരണ അതോറിറ്റി അറിയിച്ചു. 24 മണിക്കൂറില് 204.4 മില്ലിമീറ്ററില് കൂടുതല് മഴ ലഭിക്കുമെന്നാണ് മുന്നറിയിപ്പ്.ഓഗസ്റ്റ് 5, 6 (ബുധന്, വ്യാഴം) ദിവസങ്ങളില് അതിശക്തമായ മഴ സാധ്യതയുള്ളതിനാല് ജില്ലയില് ഓറഞ്ച് അലര്ട്ടും പ്രഖ്യാപിച്ചിട്ടുണ്ട്. ഈ ദിവസങ്ങളില് ഒറ്റപ്പെട്ട സ്ഥലങ്ങളില് അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. 24 മണിക്കൂറില് 115.6 മില്ലിമീറ്റര് മുതല് 204.4 മില്ലിമീറ്റര് വരെ മഴ ലഭിക്കുമെന്നാണ് സൂചന.
