കൊച്ചി : നരബലിയുടെ ഭാഗമായി രണ്ട് സ്ത്രീകളെ കടത്തിക്കൊണ്ടുപോയി കൊന്ന് കുഴിച്ചുമൂടിയ കേസില് പ്രതികരണവുമായി കൊച്ചി സിറ്റി പോലീസ് കമ്മീഷണര് എസ്. നാഗരാജു. സംശയിക്കുന്നത് ശരിയാണെങ്കില് ഇതൊരു ഞെട്ടിപ്പിക്കുന്ന കേസാണെന്നും അസാധാരണ സംഭവമാണെന്നും പോലീസ് കമ്മീഷണര് പ്രതികരിച്ചു. അതേ സമയം ഇക്കാര്യത്തില് വൈകുന്നേരത്തോടെ വ്യക്ത വരുമെന്നും അദ്ദേഹം അറിയിച്ചു.
വിവരം ലഭിച്ചതിന്റെ അടിസ്ഥാനത്തില് സംഘം തിരുവല്ലയിലേക്ക് പോയിട്ടുണ്ട്. വൈകുന്നേരത്തോടെ കാര്യങ്ങളില് വ്യക്തത വരും. ഒരു കാണാതായ കേസില് വന്ന ദുരൂഹതയാണ് സംശയത്തിലേക്ക് നയിച്ചതെന്നും പോലീസ് കമ്മീഷണര് വ്യക്തമാക്കി. കടവന്ത്രയിലാണ് കാണാതായ കേസ് രജിസ്റ്റര് ചെയ്തിട്ടുള്ളത്. അതുമായി ബന്ധപ്പെട്ടാണ് അന്വേഷണ സംഘം തിരുവല്ലയിലേക്ക് തിരിച്ചത്. തെളിവുകള് ലഭിച്ചാലെ കാണാതായവര് കൊല്ലപ്പെട്ടോ എന്നോ സ്ഥിരീകരിക്കാന് കഴിയൂ.
ഇതൊരു സാധാരണ കേസ് അല്ല. പ്രധാനപ്പെട്ട കേസായിട്ടാണ് പരിഗണിക്കുന്നത്. സംശയിക്കുന്നത് ശരിയാണെങ്കില് ഇതൊരു ഞെട്ടിപ്പിക്കുന്ന തരത്തിലുള്ള കേസാണെന്ന് തോന്നുന്നുവെന്നും കമ്മീഷണര് അറിയിച്ചു.
