കട്ടക്ക്: ഒഡീഷയിലെ കട്ടക്കില് ക്രിക്കറ്റ് മത്സരത്തിനിടെ തെറ്റായ വിധി നല്കിയതിന് അംപയറെ കുത്തിക്കൊന്ന് ആരാധകന്. 22കാരനായ ലക്കി റാവത്ത് ആണ് കൊല്ലപ്പെട്ടത്. ആരാധകനായ സ്മൃതിരഞ്ജന് റാവത്താണ് ഇയാളെ കുത്തിക്കൊന്നത്. ചൗദ്വാര് പോലീസ് സ്റ്റേഷന് പരിധിയില് മഹീഷ്ലാന്ഡ പഞ്ചായത്തിലാണ് ക്രൂരകൃത്യം നടന്നത്. മത്സരം പുരോഗമിക്കുന്നതിനിടെ അംപയര് നോ ബൗള് വിളിച്ചു. ഇതാണ് കത്തികുത്തില് കലാശിച്ചത്.
മഹീഷ്ലാന്ഡയില് അയല്നാട്ടുകാരായ ബ്രഹ്മപൂര്, ശങ്കര്പൂര് ടീമുകള് തമ്മിലായിരുന്നു ക്രിക്കറ്റ് ടൂര്ണമെന്റ്. മത്സരം കാണാന് നൂറുകണക്കിനു ക്രിക്കറ്റ് ആരാധകരും ഇവിടെ തടിച്ചുകൂടിയിരുന്നു. മത്സരം പുരോഗമിക്കുന്നതിനിടെയാണ് ബ്രഹ്മപൂരിന് പ്രതികൂലമായി അംപയര് ലക്കി വിധിച്ചത്. തെറ്റായി ‘നോ ബൗള്’ വിളിച്ചെന്ന് ആരോപിച്ചാണ് തര്ക്കങ്ങള്ക്ക് തുടക്കമായത്. ഇതിനിടെ ബ്രഹ്മപൂരുകാരിന്റെ ആരാധകനായ സ്മൃതിരഞ്ജന് റാവത്ത് അംപയറുമായി കയര്ത്തു. ഏറെനേരം ഇരുവരും തമ്മില് വാക്കേറ്റമുണ്ടായി. ഇതിനിടെ അപ്രതീക്ഷിതമായി രഞ്ജന് കത്തിയുമായെത്തി അംപയറെ കുത്തുകയായിരുന്നു.
