തിരുവനന്തപുരം: കോട്ടയം കണമലയില് നാട്ടിലിറങ്ങിയ കാട്ടുപോത്ത് ആക്രമണത്തില് രണ്ട് പേര് കൊല്ലപ്പെട്ട സംഭവത്തില് കൊമ്പുകോര്ത്ത് വനം മന്ത്രിയും കെസിബിസിയും. ഇതിനിടെ കെസിബിസിക്കെതിരെ നടത്തിയ പരാമര്ശത്തില് അനുനയ നീക്കവുമായി വനംമന്ത്രി എ കെ ശശീന്ദ്രന്. താമരശ്ശേരി ബിഷപ്പിനെ കാണാന് എ കെ ശശീന്ദ്രന് സമയം തേടി. എന്നാല്, ബിഷപ്പ് റമിജിയോസ് ഇഞ്ചനാനിയല് അസൗകര്യം അറിയിച്ചു.
കാട്ടുപോത്ത് ആക്രമണത്തില് കൊല്ലപ്പെട്ട തോമസിന്റെ സംസ്ക്കാര ചടങ്ങിന് മുഖ്യ കാര്മ്മികത്വം വഹിക്കവെ ആയിരുന്നു വഹിച്ച കാഞ്ഞിരപ്പള്ളി ബിഷപ് മാര് ജോസ് പുളിക്കല് മനുഷ്യന്റെ സുരക്ഷക്ക് യാതൊരു സംരക്ഷണവും നല്കാത്ത നിയമം മാറ്റണമെന്ന് ആവശ്യപ്പെട്ടത്. വന്യജീവി നിയമത്തില് മാറ്റം വരുത്തണം. അടിയന്തിര സാഹചര്യത്തില് ആക്രമിക്കാന് വരുന്ന മൃഗത്തെ വെടി വയ്ക്കാന് പോലും നിയമം ഇല്ലെന്നും അദ്ദേഹം കുറ്റപ്പെടുത്തിയിരുന്നു. ഇതിനോട് പ്രതികരിച്ച വനംമന്ത്രി മൃതദേഹം വെച്ചും അവരുടെ കുടുംബത്തെ വെച്ചും ചില സംഘടനകളും ചില ആളുകളും വിലപേശുന്ന സമീപനമാണ് ചിലര് സ്വീകരിക്കുന്നത് എന്നും കുറ്റപ്പെടുത്തുകയായിരുന്നു. മതമേലധ്യക്ഷന് നിലപാട് പരിശോധിക്കണമെന്നും പ്രവര്ത്തനം, പാരമ്പര്യത്തിന് നിരക്കുന്നതല്ലെന്നും മന്ത്രി പറഞ്ഞിരുന്നു.
