ഡല്ഹി: പാര്ലമെന്റ് മന്ദിരത്തിന്റെ ഉദ്ഘാടനത്തിന് ഒരാഴ്ച മാത്രം ശേഷിക്കെ, പ്രധാനമന്ത്രി നരേന്ദ്ര മോദിക്ക് പകരം രാഷ്ട്രപതിയാണ് പുതിയ പാര്ലമെന്റ് മന്ദിരം ഉദ്ഘാടനം ചെയ്യേണ്ടതെന്ന് കോണ്ഗ്രസ് നേതാവ് രാഹുല്ഗാന്ധി. മെയ് 28-ന് പ്രധാനമന്ത്രി നരേന്ദ്ര മോദിയാണ് പുതിയ പാര്ലമെന്റിന്റെ ഉദ്ഘാടനം നിര്വഹിക്കാനിരിക്കുന്നത്. പ്രധാനമന്ത്രി മോദിയുടെ പൊങ്ങച്ചം കാണിക്കുന്നതിനുള്ള പദ്ധതിയാണ് പുതിയ പാര്ലമെന്റ് മന്ദിരമെന്ന് കോണ്ഗ്രസ് നേരത്തെതന്നെ വിമര്ശനം ഉന്നയിച്ചിരുന്നു.
പുതിയ പാര്ലമെന്റ് മന്ദിരം ഉദ്ഘാടനം ചെയ്യേണ്ടത് രാഷ്ട്രപതിയാണ്, പ്രധാനമന്ത്രിയല്ല, രാഹുല് ഗാന്ധി ട്വീറ്റ് ചെയ്തു. സഭയുടെ നാഥനല്ല, സര്ക്കാരിന്റെ തലവന് മാത്രമാണ് പ്രധാനമന്ത്രി എന്ന വിമര്ശനമാണ് പ്രതിപക്ഷം പ്രധാനമായും ഉയര്ത്തിയത്. ലോക്സഭാ സ്പീക്കറോ രാജ്യസഭാ ചെയര്മാനോ മന്ദിരം ഉദ്ഘാടനം ചെയ്യാത്തത് എന്തുകൊണ്ടാണെന്ന് എഐഎംഐഎം നേതാവ് അസദുദ്ദീന് ഒവൈസി ചോദിച്ചിരുന്നു.
