കോന്നി: വി എൻ എസ് കോളേജ് ഓഫ് ആർട്സ് ആൻഡ് സയൻസ് എൻ എസ് എസ്സ് യൂണിറ്റിന്റെ ആഭിമുഖ്യത്തിൽ സംഘടിപ്പിച്ച സപ്തദിന ക്യാമ്പ് അഡ്വ. കെ യു ജനീഷ് കുമാർ എം എൽ എ ഉദ്ഘാടനം ചെയ്തു. പ്രിൻസിപ്പൾ ഇൻ ചാർജ് രഞ്ജിത്ത് വാസുദേവന്റെ അധ്യക്ഷതയിൽ കൂടിയ യോഗത്തിൽ വിഎൻ എസ് സമാജം സംസ്ഥാന ജനറൽ സെക്രട്ടറി വി എൻ മോഹനൻ മുഖ്യപ്രഭാഷണം നടത്തി. യോഗത്തിൽ വി എൻ എസ് സമാജം സംസ്ഥാന ട്രഷറർ അനിൽകുമാർ, കോളേജ് ചെയർമാൻ വിശാഖ് ചന്ദ്രൻ എന്നിവർ സംസാരിച്ചു.
പ്രക്യതിയെ അറിഞ്ഞ് കുട്ടികൾക്കൊപ്പം വാഴപ്പാറ സ്റ്റോൺ കോർണർ ഫാമിലേക്ക് ട്രക്കിംഗ് ഉൾപ്പെടെയുള്ള പരിസ്ഥിതി പഠന യാത്ര പരിസ്ഥിതിക പ്രവർത്തകനും മാധ്യമപ്രവർത്തകനുമായ പ്രശാന്ത് കോയിക്കൽ, ഡോക്ടർ അനൂപ് മുരളീധരൻ, ആശ അനൂപ്, ശ്യാം ലേ ഔട്ട് എന്നിവരുടെ നേതൃത്വത്തിൽ സംഘടിപ്പിച്ചു. പച്ചപ്പിന്റെ നിറവിലൂടെ അരുവിയുടെ തെളിമയിൽ വെള്ളച്ചാട്ടത്തിന്റെ ഭംഗി ആസ്വദിച്ചുള്ള യാത്ര കുട്ടികൾക്ക് ഒരു നവ അനുഭവമായി. അടച്ചുമൂടിയ ക്ലാസ്സ് മുറികളിലോ മൈക്കിന്റെ മുഴക്കമുള്ള ഹാളുകളിലോ അല്ല ക്യാമ്പിന്റെ ജീവൻ തുടിക്കുന്ന നിമിഷങ്ങളും ഓർമ്മകളും നിൽക്കുന്നതെന്ന് പ്രശാന്ത് കോയിക്കൽ നൽകിയ സന്ദേശത്തിൽ കുട്ടികളെ അറിയിച്ചു.
ക്യാമ്പിന്റെ ഭാഗമായി കാട്ടാത്തിപ്പാറ ഉന്നതി (ആദിവാസി കോളനി) സന്ദർശിക്കുകയും അവരുടെ കാടിനോടിണങ്ങിയുള്ള ജീവിതരീതിയും സംസ്കാരവും പാരമ്പര്യ ചികിത്സാരീതിയും കുട്ടികളെ പരിചയപ്പെടുത്തി. വിദ്യാഭ്യാസപരമായി പിന്നോക്കാവസ്ഥ നിലനിൽക്കുന്ന ഉന്നതിയിലെ നിവാസികൾക്ക് വിദ്യാഭ്യാസത്തിന്റെ പ്രാധാന്യം മനസ്സിലാക്കുന്ന കളികളും കവിതകളുമായി ഒരു ദിനം ചിലവിട്ടു. ലഹരി വിരുദ്ധ ക്യാമ്പയിൻ, ആയുർവേദ മെഡിക്കൽ അസോസിയേഷൻ ഓഫ് ഇന്ത്യ അടൂർ ഏരിയയുടെ നേതൃത്വത്തിൽ സംഘടിപ്പിച്ച “ശാരീരിക, മാനസികാരോഗ്യം ആയുർവേദത്തിലൂടെ” എന്ന വിഷയത്തെ അടിസ്ഥാനപ്പെടുത്തിയ സെമിനാറും ഗാന്ധി ഭവൻ ലഹരി വിമോചന കേന്ദ്രത്തിലെ രേഷ്മ, രാജശ്രീ എന്നിവരുടെ നേതൃത്വത്തിൽ സംഘടിപ്പിച്ച ക്ലാസ് എന്നിവ ക്യാമ്പിന്റെ ഭാഗമായി സംഘടിപ്പിച്ചു.
