റഷ്യ : രണ്ട് വര്ഷത്തിലേറെയായി ജീവിതം സ്തംഭിപ്പിച്ച കോവിഡില് നിന്ന് ലോകം മുക്തി നേടി വരുന്നതിനിടെ കൊറോണ വൈറസിനോട് സാമ്യമുള്ള പുതിയ വൈറസ് രംഗത്ത്. റഷ്യയിലെ വവ്വാലുകളിലാണ് പുതിയ വൈറസ് ഖോസ്റ്റ -2 കണ്ടെത്തിയിരിക്കുന്നതെന്ന് പ്ലോസ് പാത്തൊജന്സ് എന്ന ജേണലിലെ റിപ്പോര്ട്ടില് പറയുന്നു.
2020ല് തന്നെ വൈറസ് സാന്നിധ്യം തിരിച്ചറിഞ്ഞിരുന്നെങ്കിലും അത് ആക്രമണകാരിയല്ലെന്നായിരുന്നു അന്നത്തെ നിഗമനം. എന്നാല് പുതിയ പഠനങ്ങള് ഈ വൈറസിനെ ഭയക്കണമെന്നാണ് തെളിയിക്കുന്നതെന്ന് ശസ്ത്രജ്ഞര് പറയുന്നു. ഖോസ്റ്റ -2 മനുഷ്യരെ ബാധിക്കുമെന്ന് മാത്രമല്ല കോവിഡിനെതിരായി വാക്സിനേഷന് മുഖേന നേടിയെടുത്ത പ്രതിരോധ ശേഷി നിര്വീര്യമാക്കാനുള്ള കഴിവും പുതിയ വൈറസിനുണ്ടെന്നാണ് കണ്ടെത്തല്.
ആരെയും ഭയപ്പെടുത്താന് ആഗ്രഹിക്കുന്നില്ലെന്നും എന്നാല് പൂര്ണ്ണമായും വാക്സിന് പ്രതിരോധശേഷിയുള്ള വൈറസാണ് ഇതെന്ന് പറയുന്നില്ലെന്നും പഠനത്തിലെ പ്രധാന ശാസ്ത്രജ്ഞനായ മൈക്കല് ലെറ്റ്കോ ടൈം മാഗസിനോട് പറഞ്ഞു. ഈ വൈറസുകള്ക്ക് മനുഷ്യരുടെ റിസപ്റ്റേഴ്സുമായി ബന്ധപ്പെടാന് സാധിക്കും. നിലവിലെ കോവിഡ് വാക്സിനേഷന് കൊണ്ട് അവയെ നിര്വീര്യമാക്കാനുമാകില്ല.
വാഷിംഗ്ടണ് സ്റ്റേറ്റ് യൂണിവേഴ്സിറ്റിയിലെ ഗവേഷകര് പറയുന്നതനുസരിച്ച് ഈ വൈറസ് ശ്വസന വൈറസായ സാര്ബെക്കോവൈറസ് എന്ന കൊറോണ വൈറസുകളുടെ ഉപവിഭാഗത്തിലാണ് വരുന്നത്. അതിനാല് തന്നെ വന്യജീവികളിലെ സാര്ബെക്കോവൈറസുകള് ആഗോള ആരോഗ്യത്തിനും കോവിഡ് വാക്സിനേഷന് കാമ്പൈയ്നുകള്ക്കും ഭീഷണിയാണെന്നും പഠനം വ്യക്തമാക്കുന്നു.