ആലപ്പുഴ: ആലപ്പുഴയിൽ സൈക്കിളിൽ നിന്ന് വീണ് ഇതര സംസ്ഥാന യുവതി മരിച്ചു. ബീഹാർ സ്വദേശി സൈറ ഹാത്തൂൻ (30) ആണ് മരിച്ചത്. ജലവിതരണ ലോറിയിലെ ഡ്രൈവറാണ് ഭർത്താവ് ലഡു. കുടുംബത്തോടൊപ്പം യാത്ര ചെയ്യുമ്പോൾ ആയിരുന്നു അപകടം. കഴിഞ്ഞദിവസം വൈകിട്ട് ഭർത്താവും ഇളയകുട്ടിയും അടക്കം സൈക്കിളിൽ യാത്ര ചെയ്യുന്നതിനിടയിലാണ് മാന്നാറിൽ വച്ച് കൈക്കുഞ്ഞ് താഴേക്ക് പതിക്കുന്ന സ്ഥിതി വന്നത്. കുഞ്ഞിനെ രക്ഷിക്കാൻ അമ്മ ശ്രമിക്കുന്നതിനിടയിലാണ് റോഡിൽ വീണ് അമ്മയ്ക്ക് ദാരുണാന്ത്യം സംഭവിച്ചത്. ഗുരുതരമായി പരുക്കേറ്റ് ആശുപത്രിയിൽ എത്തിയ സൈറ ഇന്ന് പുലർച്ചെ മരണപ്പെടുകയായിരുന്നു.
ബീഹാർ സ്വദേശിയായ ഭർത്താവും മൂന്ന് കുരുന്നുകളുമായാണ് ആശുപത്രിയിൽ എത്തിയത്. അമ്പലപ്പുഴ എംഎൽഎ എച്ച് സലാം ഇടപെടുകയും മന്ത്രി സജി ചെറിയാൻ ഉടൻ ആശുപത്രിയിൽ എത്തുകയും ചെയ്തു. ഇവർക്ക് വേണ്ടുന്ന സഹായങ്ങൾ മന്ത്രി വാഗ്ദാനം ചെയ്തു. ഇതിനിടയിൽ മറ്റു സംഘടനകളും സഹായവുമായി രംഗത്ത് വന്നതോടെ സൈറയുടെ മൃതദേഹം പോസ്റ്റ്മോർട്ടത്തിനു ശേഷം ബീഹാറിലേക്ക് കൊണ്ടുപോകാനുള്ള സംവിധാനങ്ങൾ ഒരുങ്ങി. വിമാനമാർഗമായിരിക്കും മൃതദേഹം സ്വന്തം നാട്ടിൽ എത്തിക്കുക. ഒപ്പം ഭർത്താവിനും മൂന്നു കുട്ടികൾക്കുമുള്ള യാത്രാസൗകര്യവും ഒരുക്കിയിട്ടുണ്ട്.
