മാനന്തവാടി : നൂല്പ്പുഴ പഞ്ചായത്തിലെ വള്ളുവാടിയില് കഴിഞ്ഞ ദിവസമുണ്ടായ കടുവയുടെ ആക്രമണത്തില് പരിക്കേറ്റ പശു ചത്തു. നൂല്പ്പുഴ മാടക്കുണ്ട് പണിയ കോളനിയ്ക്ക് സമീപത്തെ കരവെട്ടാറ്റിന്കര പൗലോസിന്റെ ഗര്ഭിണിയായ പശുവാണ് ഇന്ന് രാവിലെ ചത്തത്. ഇന്നലെ ഉച്ചയ്ക്ക് ഒന്നരയോടെ വീടിന് സമീപത്തെ പറമ്പില് മേയുന്നതിനിടെയായിരുന്നു കടുവയുടെ ആക്രമണം. കടുവയുടെ നഖവും പല്ലുകളും ആഴ്ന്നിറങ്ങി പശുവിന് ഗുരുതര പരിക്കേറ്റിരുന്നു. അന്നനാളത്തിലടക്കം മുറിവുള്ളതിനാല് വെള്ളമോ ഭക്ഷണമോ കഴിക്കാന് കഴിയാത്ത അവസ്ഥയിലായിരുന്നു പശു.
പശു രാത്രി തീര്ത്തും അവശയായിരുന്നു. പശുവിന്റെ കരച്ചില് കേട്ടെത്തിയ മാടക്കുണ്ട് കോളനിവാസികളില് ചിലരാണ് കടുവയെ ആദ്യം കണ്ടത്. ആളുകള് ബഹളം വെച്ചതോടെ കടുവ പശുവിനെ ഉപേക്ഷിച്ച് സമീപത്തെ വനത്തിലേക്ക് ഓടി മറയുകയായിരുന്നു. പതിനഞ്ച് ദിവസം മുമ്പും പൗലോസിന്റെ പശുവിനെ കടുവ ആക്രമിച്ചിരുന്നു. വനത്തിനുള്ളില് മേയുന്നിതിനിടെയായിരുന്നു അന്ന് കടുവയെത്തിയത്.
