റാന്നി: 2025 – 26 അധ്യയന വർഷം വൈക്കം ഗവൺമെന്റ് യുപി സ്കൂളിന് നേട്ടങ്ങളുടെ പെരുമഴക്കാലം. റാന്നി ഉപജില്ല കലോത്സവം സെക്കൻഡ് റണ്ണറപ്പ് ട്രോഫി കലസ്ഥമാക്കിയതിനോടൊപ്പം ശാസ്ത്രോത്സവത്തിലും സെക്കൻഡ് റണ്ണറപ്പ് സ്ഥാനത്തിന് അർഹത നേടി. പാഠ്യ-പാഠ്യേതര പ്രവർത്തനങ്ങളിൽ മികവാർന്ന പ്രവർത്തനങ്ങളാൽ എന്നും ശ്രദ്ധേയമാണ് വൈക്കം ഗവൺമെന്റ് യു.പി.സ്കൂൾ. ഉപജില്ലയിലെ തന്നെ ഏറ്റവും കൂടുതൽ വിദ്യാർത്ഥികൾ പഠിക്കുന്ന ഗവൺമെന്റ് സ്കൂളുകളിൽ ഒന്നാണ്. അടുത്ത അധ്യയന വർഷം സ്കൂളിന്റെ മുഖച്ഛായ തന്നെ മാറുകയാണ്.
എസ്.എസ്.കെയുടെ നേതൃത്വത്തിലുള്ള വർണ്ണക്കൂടാരം പ്രോജക്ട് പ്രവർത്തനങ്ങൾ സ്കൂളിൽ പുരോഗമിച്ചുകൊണ്ടിരിക്കുന്നു. ഭൗതിക സാഹചര്യങ്ങൾ കൂടുതൽ മെച്ചപ്പെട്ടു. സ്മാർട്ട് ക്ലാസ് റൂമുകളുടെ എണ്ണം വർദ്ധിച്ചു. മികവിൽ നിന്നും മികവിലേക്കുള്ള പ്രയാണത്തിൽ വിദ്യാർത്ഥികൾക്കും അധ്യാപകർക്കും ഒപ്പം രക്ഷിതാക്കളുടെയും പിടിഎയുടെയും അഭ്യൂദയകാംക്ഷികളുടെയും നിർലോഭമായ സഹകരണവും ഉണ്ടായിട്ടുണ്ടെന്ന് സ്കൂള് പ്രഥമധ്യാപകന് സി.പി സുനില് പറഞ്ഞു.
