തൃശൂർ : തൃശൂർ – കുന്നംകുളം റോഡിൽ ചൂണ്ടൽ പാലത്തിന് സമീപം ഓടിക്കൊണ്ടിരുന്ന വാഹനത്തിന് മുകളിലേക്ക് മരക്കൊമ്പ് വീണ് അപകടം. തൃശൂരിൽ നിന്ന് കുന്നംകുളം ഭാഗത്തേക്ക് പോവുകയായിരുന്ന ടാക്സി കാറിന് മുകളിലേക്കാണ് വലിയ മരക്കൊമ്പ് തറച്ചു കയറിയത്. ഇന്ന് രാവിലെ 11:45-ഓടെയാണ് സംഭവം നടന്നത്. രാവിലെ മുതൽ തൃശൂരിന്റെ വിവിധ ഭാഗങ്ങളിൽ ശക്തമായ കാറ്റും മഴയും അനുഭവപ്പെട്ടിരുന്നു. ഇതിനിടയിലാണ് കാർ ചൂണ്ടൽ പാലത്തിന് സമീപമെത്തിയപ്പോൾ മരക്കൊമ്പ് പൊട്ടിവീണത്. മരക്കൊമ്പ് കാറിന്റെ മുൻവശത്തെ ഗ്ലാസ് തകർത്ത് ഉള്ളിലേക്ക് തറച്ചു കയറുകയായിരുന്നു. അപകടസമയത്ത് ഡ്രൈവർ വിൽഫിഡും ഒരു യാത്രക്കാരനുമാണ് വാഹനത്തിലുണ്ടായിരുന്നത്.
മരക്കൊമ്പ് കൃത്യമായി ഇരുവരുടെയും ഇടയിലേക്കാണ് തറച്ചു കയറിയത്. ഡ്രൈവർ ഇരിക്കുന്ന ഭാഗത്തേക്കോ യാത്രക്കാരന്റെ ഭാഗത്തേക്കോ ആണ് ഇത് വീണിരുന്നതെങ്കിൽ വലിയൊരു ദുരന്തത്തിന് ഇത് കാരണമാകുമായിരുന്നു. ഭാഗ്യം കൊണ്ട് മാത്രമാണ് ഇരുവരും പരിക്കേൽക്കാതെ രക്ഷപ്പെട്ടത്. കൊമ്പ് വന്ന് വീണ ഉടനെ പരിഭ്രാന്തിയിലായ ഡ്രൈവർ 50 മീറ്ററോളം ദൂരം കൂടി വാഹനം ഓടിച്ച ശേഷമാണ് സൈഡ് ആക്കി നിർത്തിയത്.
