കോന്നി : ആദിവാസി യുവതി ആംബുലൻസിൽ പെൺകുഞ്ഞിന് ജന്മം നൽകി.തണ്ണിത്തോട് മൂഴി മൂഴിക്കൽ ഷാജിയുടെ ഭാര്യ അശ്വതി(24)ആണ് പെൺകുഞ്ഞിന് ജന്മം നൽകിയത്. രാവിലെ ഒൻപതരയോടെ യുവതിക്ക് പ്രസവ വേദന അനുഭവപെട്ടതിനെതുടർന്ന് വീട്ടുകാർ ആശ പ്രവർത്തകരെ അറിയിച്ചു. തുടർന്ന് ആശ പ്രവർത്തകർ എത്തിയതിനു ശേഷം ചിറ്റാറിൽ നിന്നും ആംബുലൻസ് എത്തിച്ചു. ആശുപത്രിയിലേക്ക് കൊണ്ടുപോകുന്നതിനായി ആംബുലൻസിൽ കയറ്റി എങ്കിലും അധികം താമസിക്കാതെ തന്നെ യുവതി പെൺ കുഞ്ഞിന് ജന്മം നൽകുകയായിരുന്നു. തുടർന്ന് ആശ പ്രവർത്തകർ പ്രഥമ ശുശ്രൂഷ നൽകിയതിന് ശേഷം യുവതിയെയും കുഞ്ഞിനെയും പത്തനംതിട്ട ജനറൽ ആശുപത്രിയിൽ എത്തിക്കുകയായിരുന്നു. അമ്മയും കുഞ്ഞും സുഖമായിരിക്കുന്നതായി ആരോഗ്യ വകുപ്പ് അറിയിച്ചു.
