കോന്നി : തേക്കുതോട് ആലുവാംകുടി ഉൾവനത്തിൽ താത്കാലിക ഷെഡിന് തീ പിടിച്ചതിനെ തുടർന്ന് ഇതിൽ താമസിച്ച ആദിവാസി യുവതിക്ക് പൊള്ളലേറ്റു. സിന്ധു (28) നാണ് പൊള്ളലേറ്റത്. കഴിഞ്ഞ രാത്രിയിൽ 8 മണിയോടെ ആയിരുന്നു സംഭവം. തേൻ ശേഖരിക്കുന്നതിനായി എത്തിയ യുവതി ആലുവാംകുടി വനത്തിനുള്ളിൽ നാല് കിലോമീറ്റർ ഉൾവനത്തിൽ തത്കാലിക ഷെഡ് നിർമ്മിച്ച് താമസിക്കുകയായിരുന്നു. ഷെഡിന് മുന്നിൽ ഉണ്ടായിരുന്ന ആഴിയിൽ നിന്നും ഉയർന്ന തീ ഷെഡിലേക്ക് പടരുകയായിരുന്നു.
രാത്രി ഒൻപതരയോടെ ആണ് സംഭവം പുറം ലോകമറിയുന്നത്. തുടർന്ന് തണ്ണിത്തോട് പോലീസ് സ്റ്റേഷൻ ഹൗസ് ഓഫീസറെ വിവരം ധരിപ്പിക്കുകയും സി ഐ യുടെ നേതൃത്വത്തിൽ ഉള്ള പോലീസും നാട്ടുകാരും സ്ഥലത്തെത്തി യുവതിയെ നാല് കിലോമീറ്ററോളം വനത്തിൽ നിന്നും ചുമന്ന് പുറത്തെത്തിച്ച ശേഷം ആംബുലൻസിൽ ആശുപത്രിയിലേക്ക് മാറ്റുകയായിരുന്നു. നാല്പത് ശതമാനത്തോളം പൊള്ളലേറ്റ യുവതിയെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
