പീരുമേട് : ദേശീയ പാതയിൽ വണ്ടിപ്പെരിയാർ ചുരക്കുളം ആശുപത്രിക്ക് സമീപം അയ്യപ്പ ഭക്തർ സഞ്ചരിച്ചിരുന്ന വാൻ നിയന്ത്രണം വിട്ട് ഓട്ടോറിക്ഷയിൽ ഇടിച്ച് അപകടം. 3 പേർക്ക് പരിക്കേറ്റു. ഇന്ന് വൈകുന്നേരം 3.30 നായിരുന്നു സംഭവം. ശബരിമല ദർശനം കഴിഞ്ഞ് മടങ്ങുകയായിരുന്ന തമിഴ് നാട് കാരയ്ക്കൽ സ്വദേശികളായ അയ്യപ്പഭക്തർ സഞ്ചരിച്ചിരുന്ന വാൻ വണ്ടിപ്പെരിയാർ ചുരക്കുളം ആശുപത്രിക്ക് സമീപമെത്തിയപ്പോൾ മറ്റൊരു വാഹനത്തെ മറികടക്കുന്നതിനിടെ നിയന്ത്രണം വിട്ട് എതിരെ വന്ന ഓട്ടോറിക്ഷയിൽ ഇടിക്കുകയായിരുന്നു.
വണ്ടിപ്പെരിയാർ നെല്ലി മലയിൽ നിന്നും വരികയായിരുന്ന ഐശ്വര്യ ഭവനിൽ രാജയുടെ ഓട്ടോറിക്ഷയിലാണ് വാൻ ഇടിച്ചത്. അപകടത്തിൽ ഓട്ടോറിക്ഷ ഡ്രൈവർ രാജയ്ക്കും 2 യാത്രികർക്കും പരിക്കേറ്റു. ഗുരുതരമായി പരിക്കേറ്റ ഓട്ടോറിക്ഷ യാത്രികരായ 2 പേരെ കോട്ടയം മെഡിക്കൽ കോളജ് ആശുപത്രിയിലും ഡ്രൈവറെ കാഞ്ഞിരപ്പള്ളിയിലെ ആശുപത്രിയിലും പ്രവേശിപ്പിച്ചു. ഇടിയുടെ ആഘാതത്തിൽ റോഡിൽ വട്ടം കറങ്ങി റോഡരുകിലെ മതിലിൽ ഇടിച്ച ഓട്ടോറിക്ഷ പൂർണ്ണമായും തകർന്നു. നിയന്ത്രണം വിട്ട അയ്യപ്പ ഭക്തരുടെ വാഹനം ഓട്ടോറിക്ഷയിൽ ഇടിച്ച ശേഷം റോഡരുകിൽ കിടന്നിരുന്ന ഉന്തുവണ്ടിയും തകർത്ത് മതിലിൽ ഇടിച്ച് നിൽക്കുകയായിരുന്നു. വണ്ടിപ്പെരിയാർ പോലീസ് സ്ഥലത്തെത്തി മേൽ നടപടികൾക്ക് ശേഷം അയ്യപ്പ ഭക്തരെ മറ്റൊരു വാഹനത്തിൽ തമിഴ്നാട് കാരയ്ക്കലിലേക്കയച്ചു.
