തിരുവനന്തപുരം : മാനവീയം വീഥിയിൽ വെച്ച് മലയൻകീഴ് സ്വദേശിയായ യുവാവിനെ ക്രൂരമായി മർദ്ദിച്ച സംഭവത്തിൽ രണ്ട് യുവാക്കളെ പോലീസ് അറസ്റ്റ് ചെയ്തു. ബാലരാമപുരം സ്വദേശികളായ കാശിനാഥൻ (22), ഉണ്ണികൃഷ്ണൻ (23) എന്നിവരാണ് മ്യൂസിയം പോലീസിന്റെ പിടിയിലായത്. മെയ് 10-ാം തീയതി രാത്രി ഒൻപത് മണിയോടെയാണ് അക്രമം ഉണ്ടായത്. ജോലി കഴിഞ്ഞ് സുഹൃത്തുക്കൾക്കൊപ്പം ചായ കുടിക്കാനായി മാനവീയം വീഥിയിൽ എത്തിയതായിരുന്നു യുവാവ്. പ്രതികൾ തങ്ങളെ ‘തുറിച്ചുനോക്കി’ എന്ന് ആരോപിച്ച് യുവാവിനെ അസഭ്യം പറയുകയും ഇത് ചോദ്യം ചെയ്തപ്പോൾ ക്രൂരമായി മർദ്ദിക്കുകയുമായിരുന്നു.
മാരകായുധങ്ങൾ കൊണ്ടുള്ള ആക്രമണത്തിൽ യുവാവിന്റെ മുഖത്ത് ഗുരുതരമായി പരിക്കേറ്റിട്ടുണ്ട്. നിലവിൽ ഇയാൾ ചികിത്സയിൽ തുടരുകയാണ്. അക്രമത്തിന് ശേഷം സ്ഥലത്തു നിന്ന് കടന്നുകളഞ്ഞ പ്രതികളെ പിന്നീട് പാളയത്ത് വെച്ചാണ് മ്യൂസിയം പോലീസ് കസ്റ്റഡിയിലെടുത്തത്. പ്രതികൾ മദ്യലഹരിയിലാണ് അക്രമം നടത്തിയത് എന്ന് പോലീസ് അറിയിച്ചു. പിടിയിലായ കാശിനാഥനെതിരെ ബാലരാമപുരം പോലീസ് സ്റ്റേഷനിൽ മാത്രം മൂന്ന് അടിപിടി കേസുകൾ നിലവിലുണ്ട്.
