കോട്ടയം: മണർകാട് വെച്ചുണ്ടായ വാഹനാപകടത്തിൽ യുവാവിന് ദാരുണാന്ത്യം. പാമ്പാടി വെളളൂര് പങ്ങട വടക്കേപ്പറമ്പില് ജോസിന്റെ മകന് എമില് ജോസ് (20) ആണ് മരിച്ചത്. യുവാവ് സഞ്ചരിച്ച ഓട്ടോയിൽ നിന്നും പുക ഉയരുന്നത് ശ്രദ്ധയിൽ പെട്ടതോടെ ഇത് പരിശോധിക്കുന്നതിനായി വാഹനം നിർത്തി റോഡിലിറങ്ങിയപ്പോഴാണ് ഏറ്റുമാനൂര് ഭാഗത്തുനിന്ന് വന്ന ഒരു കാർ യുവാവിനെ ഇടിച്ചത്. ബുധനാഴ്ച്ച ഉച്ചയ്ക്ക് ഒരുമണിയോടെയായിരുന്നു സംഭവം. ഉടൻ തന്നെ യുവാവിനെ മണര്കാട്ടെ സ്വകാര്യ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
തിരുവഞ്ചൂരിലെ പളളിയില് നിന്നും മുത്തുക്കുട എടുത്ത് തിരികെ വരികയായിരുന്നു എമിലും സുഹൃത്തുക്കളും. മണര്കാട് നാലുമണിക്കാറ്റ് ഭാഗത്ത് എത്തിയപ്പോള് ഓട്ടോയില് നിന്ന് പുക ഉയരുന്നത് ഇവരുടെ ശ്രദ്ധയില്പ്പെടുകയായിരുന്നു. ഇതിന് പിന്നാലെ ഓട്ടോ റോഡരികില് ഒതുക്കി. തുടര്ന്ന് എമില് റോഡിലിരുന്ന് ഓട്ടോയുടെ അടിഭാഗം പരിശോധിക്കുന്നതിനിടെയാണ് കാർ ഇടിച്ചത്. അപകടമുണ്ടാക്കിയ കാറിൽ തന്നെയാണ് എമിലിനെ ആശുപത്രിയിലെത്തിച്ചത്. സംഭവത്തിൽ മണർകാട് പോലീസ് കേസ് രജിസ്റ്റർ ചെയ്തു.
