തിരുവനന്തപുരം : സംസ്ഥാനത്ത് സര്ക്കാര് ജോലിയില് പ്രവേശിക്കാന് ആധാര് നിര്ബന്ധമാക്കി. ജോലിയില് പ്രവേശിക്കുന്നവര് ഒരുമാസത്തിനകം അവരുടെ പി.എസ്.സി. ഒറ്റത്തവണ രജിസ്ട്രേഷന് പ്രൊഫൈലില് ആധാര് ബന്ധിപ്പിക്കണം. ഇത് നിയമനാധികാരികള് ഉറപ്പുവരുത്തണം. ഉദ്യോഗസ്ഥ-ഭരണപരിഷ്കാര വകുപ്പാണ് ഉത്തരവിറക്കിയത്.
ജോലിയില് പ്രവേശിച്ച് സര്വീസ് വെരിഫിക്കേഷന് പൂര്ത്തിയാക്കാത്തവരും പി.എസ്.സി പ്രൊഫൈലുമായി ആധാറിനെ ബന്ധിപ്പിക്കണം. ആള്മാറാട്ടം തടയാന് ആധാര് നിര്ബന്ധമാക്കണമെന്ന് പി.എസ്.സി. സെക്രട്ടറി കത്തു നല്കിയിരുന്നു. ഇതനുസരിച്ചാണ് ഉത്തരവിറങ്ങിയിരിക്കുന്നത്. പി.എസ്.സി.യുടെ ഒറ്റത്തവണ പരിശോധന, നിയമന പരിശോധന, ഓണ്ലൈന് പരീക്ഷകള്, അഭിമുഖം എന്നിവ നടത്താന് ആധാറുമായി ബന്ധപ്പെടുത്തി ബയോമെട്രിക് തിരിച്ചറിയല് നടത്തുന്നുണ്ട്. ആറുമാസം മുമ്പാണ് പി.എസ്.സി. ഇതാരംഭിച്ചത്. ആള് മാറാട്ടത്തിലൂടെയുള്ള തൊഴില് തട്ടിപ്പ് തടയുകയാണ് ലക്ഷ്യം. നിയമന ശുപാര്ശ നേരിട്ട് കൈമാറുന്ന രീതി ഈയിടെ പി.എസ്.സി. ആരംഭിച്ചിരുന്നു. അതും ആധാറുമായി ബന്ധിപ്പിച്ചാണ് വിരലടയാളം ഉള്പ്പെടെ തിരിച്ചറിയല് നടത്തിയിരുന്നത്. കോവിഡ് ഭീഷണിയെത്തുടര്ന്ന് ഇത് താത്കാലികമായി നിര്ത്തിവെച്ചു.
പി.എസ്.സി.യുടെ നിയമനപരിശോധന 2010 മുതലാണ് ഏര്പ്പെടുത്തിയത്. സേവന പുസ്തകത്തിലെ ഫോട്ടോ, പേര്, വിലാസം, വിരലടയാളം, തിരിച്ചറിയല് അടയാളങ്ങള് എന്നിവ നിയമനാധികാരി സാക്ഷ്യപ്പെടുത്തി പി.എസ്.സി.ക്കു കൈമാറും. ഇവ ജീവനക്കാരന്റെ ബയോമെട്രിക് വിവരങ്ങളുമായി ഒത്തുനോക്കിയാണ് നിയമനപരിശോധന. അതിനു ശേഷമേ ജീവനക്കാരനെ ജോലിയില് സ്ഥിരപ്പെടുത്തൂ. ഒരുവര്ഷം മുമ്പേ ആധാറിനെ തിരിച്ചറിയല് രേഖയാക്കി പി.എസ്.സി. അംഗീകരിച്ചിരുന്നു. പ്രൊഫൈലില് ആധാര് നമ്പര് ബന്ധപ്പെടുത്തുന്ന രീതിയും ആരംഭിച്ചു.
