കോന്നി : മൂന്നുവർഷത്തെ ഇടവേളക്ക് ശേഷം കോന്നി ആനതാവളത്തിൽ ലോക ഗജ ദിനത്തോട് അനുബന്ധിച്ച് ആനയൂട്ട് നടന്നു. കോന്നി ആനതാവളത്തിലെ ഗജ വീരന്മാരായ ഇളമുറക്കാരൻ കോന്നി കൊച്ചയ്യപ്പൻ മുതൽ തലയെടുപ്പിന്റെ രാജാവായ കോടനാട് നീല കണ്ഠൻ വരെ കുളികഴിഞ്ഞ് ഭസ്മം തൊട്ട് ആനത്താവളത്തിന്റെ മൈതാനിയിൽ അണിനിരന്നപ്പോൾ ആനത്താവളത്തിലെത്തിയ സന്ദർശകർക്കും അത് പുതിയ അനുഭവമായി. ഓരോ ആനയുടെ മുന്നിലും വാഴയിലയിൽ ആപ്പിൾ, ഓറഞ്ച്, പഴം, ശർക്കര, മുന്തിരി, തണ്ണിമത്തൻ, എത്തപഴം, കൈതച്ചക്ക തുടങ്ങി സമൃദ്ധമായ വിഭവങ്ങളോടെയാണ് ആനയൂട്ട് നടന്നത്.
കോന്നി ഡി എഫ് ഓ ആയുഷ് കുമാർ മോറി ഐ എഫ് എസ് കോന്നിയിലെ കുട്ടികുറുമ്പൻ കൊച്ചയ്യപ്പന് ചെറു പഴം നൽകിയാണ് ആനയൂട്ട് ഉദ്ഘാടനം ചെയ്തത്. കോന്നി റേഞ്ച് ഓഫീസർ ജോജി ജെയിംസ്, ഫോറെസ്റ്റർ ദിലീപ്, ബീറ്റ് ഓഫീസർ സൗമേന്ദ്രകുമാർ, അജിത് കുമാർ, സലിം തുടങ്ങിയവർ ആനയൂട്ടിന് നേതൃത്വം നൽകി. കോന്നി കൊച്ചയ്യപ്പൻ, കൃഷ്ണ, ഈവ, പ്രിയദർശിനി, മീന, കോടനാട് നീല കണ്ഠൻ എന്നീ ആനകൾ ആനയൂട്ടിൽ പങ്കെടുത്തു.
ഗജ ദിനത്തോട് അനുബന്ധിച്ച് പൊതു ജനങ്ങൾക്ക് ആനയൂട്ടിൽ പങ്കെടുക്കാനും ആനക്കൊപ്പം നിൽക്കുവാനും വനംവകുപ്പ് സൗകര്യം ഒരുക്കിയിരുന്നു. കൂടാതെ ഗജ ദിനത്തിന്റെ ഭാഗമായി സൊസൈറ്റി ഫോർ എലിഫൻറ് വെൽഫെയർ നേതൃത്വത്തിൽ സെമിനാറും ചിത്ര രചന മത്സരവും നടന്നു. കോന്നി റേഞ്ച് ഓഫീസർ ജോജി ജെയിംസ് ഉദ്ഘാടനം ചെയ്തു. സംഘടനാ ചെയർപേഴ്സണും ഗായികയുമായ ചിത്ര അയ്യരുടെ നേതൃത്വത്തിൽ ആണ് പരിപാടി നടന്നത്. ഇരുനൂറിലധികം കുട്ടികൾ പങ്കെടുത്തു.
