തിരുവനന്തപുരം: പ്രായപൂര്ത്തിയാകാത്ത പെണ്കുട്ടിയെ പീഡിപ്പിക്കുകയും ഇക്കാര്യം വെളിപ്പെടുത്തിയാല് കൊല്ലുമെന്ന് ഭീഷണിപ്പെടുത്തുകയും ചെയ്ത സംഭവത്തില് നാലുപേര് അറസ്റ്റില്. അഞ്ചുതെങ്ങ് പോലീസ് ആണ് പ്രതികളെ വ്യാഴാഴ്ച അറസ്റ്റ് ചെയ്തത്. പെണ്കുട്ടിയുടെ വീടിന് സമീപം താമസിച്ചിരുന്നവരായിരുന്നു പ്രതികള്. ഇവര് പെണ്കുട്ടിയുടെ അകന്ന ബന്ധുക്കളുമാണ്. കൊവിഡിന്റെ ഭാഗമായി വന്ന ലോക്ക്ഡൗണ് സമയത്ത് പ്രതികള് പെണ്കുട്ടിയെ ഒഴിഞ്ഞുകിടന്ന കെട്ടിടത്തിന്റെ ടെറസിലും പ്രദേശത്തുള്ള ചെറിയ ടെന്റിലും കൊണ്ടുപോയി പീഡിപ്പിച്ചുവെന്നാണ് കേസ്.
പെണ്കുട്ടിയുടെ മാതാപിതാക്കള് സംഭവം പുറത്ത് വിട്ടിരുന്നില്ല. എന്നാല് കൊവിഡിന് ശേഷം പെണ്കുട്ടി തിരികെ സ്കൂളില് എത്തിയതോടെയാണ് സംഭവം പുറത്തറിയുന്നത്. തുടര്ന്ന് സ്കൂള് അധികൃതര് പോലീസിനെയും ശിശുക്ഷേമ സമിതിയെയും വിവരമറിയിച്ചു. പെണ്കുട്ടിയെ കൗണ്സിലിംഗിന് വിധേയമാക്കുകയും ചെയ്തു. മൊഴി രേഖപ്പെടുത്തിയ ശേഷം പോലീസ് പോക്സോ കേസ് രജിസ്റ്റര് ചെയ്യുകയായിരുന്നു. ഒളിവിലായിരുന്ന പ്രതികളെ വിവിധ സ്ഥലങ്ങളില് നിന്നാണ് പോലീസ് പിടികൂടിയത്. കോടതിയില് ഹാജരാക്കിയ ഇവരെ റിമാന്ഡ് ചെയ്തു.
