തൊടുപുഴ: 13 വയസ്സുകാരനെ പ്രകൃതിവിരുദ്ധ ലൈംഗിക പീഡനത്തിന് വിധേയനാക്കിയയാള്ക്ക് 12 വര്ഷം കഠിനതടവും 55,000 രൂപ പിഴയും. കൊന്നത്തടി സ്വദേശി സോമനെയാണ് (65) ഇടുക്കി ഫാസ്റ്റ് ട്രാക് പ്രത്യേക കോടതി ജഡ്ജി ടി.ജി. വര്ഗീസ് ശിക്ഷിച്ചത്. പോക്സോ നിയമപ്രകാരം ഏഴുവര്ഷം കഠിനതടവും അരലക്ഷം രൂപ പിഴയും പ്രകൃതിവിരുദ്ധ പീഡനത്തിന് അഞ്ചുവര്ഷം കഠിനതടവും 5000 രൂപ പിഴയുമാണ് ശിക്ഷ. ശിക്ഷ ഒരേകാലയളവില് അനുഭവിച്ചാല് മതിയെന്നതിനാല് തടവ് ഏഴുവര്ഷമായി ചുരുങ്ങും. പിഴ അടച്ചില്ലെങ്കില് ഏഴുമാസം കൂടി തടവ് അനുഭവിക്കണം. ഇതിനു പുറമെ ജില്ല ലീഗല് സര്വിസസ് അതോറിറ്റിയോട് അരലക്ഷം രൂപ നഷ്ടപരിഹാരം ലഭ്യമാക്കാന് നടപടി സ്വീകരിക്കാനും കോടതി നിര്ദേശിച്ചു. 2019 ജനുവരിയിലാണ് കേസിനാസ്പദമായ സംഭവം. പള്ളി പെരുന്നാളിനോട് അനുബന്ധിച്ച് സ്ഥാപിച്ച താല്ക്കാലിക കടയില് സാധനം വാങ്ങാനെത്തിയ ബാലനെയാണ് പീഡിപ്പിച്ചത്. വെള്ളത്തൂവല് പോലീസാണ് കേസ് അന്വേഷിച്ചത്. പ്രോസിക്യൂഷനുവേണ്ടി സ്പെഷല് പബ്ലിക് പ്രോസിക്യൂട്ടര് എസ്.എസ്. സനീഷ് ഹാജരായി.
