തിരുവനന്തപുരം: ഇന്സ്റ്റഗ്രാം വഴി പരിചയപ്പെട്ട സ്കൂള് വിദ്യാര്ത്ഥിനികളെ പീഡിപ്പിച്ച കേസില് 18കാരന് കൊല്ലത്ത് പിടിയില്. ഇടത്തറ സ്വദേശി നീരജിനെയാണ് ചടയമംഗലം പോലീസ് അറസ്റ്റ് ചെയ്തത്. ചടയമംഗലം സ്വദേശിയായ ഏഴാം ക്ലാസുകാരിയെ ഇന്സ്റ്റഗ്രാം വഴിയാണ് നീരജ് പരിചയപ്പെടുന്നത്. പിന്നീട് പെണ്കുട്ടിയുമായി സൗഹൃദത്തിലായി. ഒടുവില് വിദ്യാര്ത്ഥിയുടെ വീട്ടിലെത്തിയ നീരജ് ഏഴാം ക്ലാസുകാരിയെ ലൈംഗിക അതിക്രമത്തിന് ഇരയാക്കുകയായിരുന്നു. കഴിഞ്ഞ ദിവസം പെണ്കുട്ടിയുടെ വീട്ടിലെത്തിയ നീരജിനെ നാട്ടുകാര് തടഞ്ഞുവെച്ച് പോലീസില് ഏല്പ്പിക്കുകയായിരുന്നു.
ചോദ്യം ചെയ്യലില് മാസങ്ങളായി കുട്ടിയെ പീഡിപ്പിച്ചു വരികയായിരുന്നു എന്ന് പ്രതി സമ്മതിച്ചു. കടക്കല് സ്വദേശിയായ എട്ടാം ക്ലാസുകാരിയെയും സമാനമായ രീതിയില് പ്രതി നീരജ് പീഡിപ്പിച്ചിരുന്നു. രണ്ട് കുട്ടികളുടെയും മൊഴി രേഖപ്പെടുത്തിയ പോലീസ് പോക്സോ വകുപ്പുകള് ചുമത്തി യുവാവിനെതിരെ കേസെടുത്തു. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
