തിരുവനന്തപുരം: വട്ടപ്പാറയില് കെഎസ്ആര്ടിസി ബസ്സുകള് കൂട്ടിയിടിച്ച് അന്പതോളം പേര്ക്ക് പരിക്ക്. ബ്രേക്ക് തകരാറിലായത് കാരണം. വാഹനം വെട്ടിച്ച് മാറ്റുന്നതിനിടയിലാണ് അപകടം സംഭവിച്ചത്. മരുതൂര് പാലത്തിന് സമീപമാണ് കെ എസ് ആര്ടിസി ബസ്സുകള് തമ്മില് കൂട്ടിയിടിച്ചത്. പുനലൂര് ഭാഗത്ത് നിന്ന് യാത്രക്കാരുമായി തിരുവനന്തപുരത്തേക്ക് വന്ന ബസ്സും തിരുവനന്തപുരത്ത് നിന്ന് കിളിമാനൂര് ഭാഗത്തേക്ക് പോകുകയായിരുന്ന ബസ്സുമാണ് കൂട്ടിയിടിച്ചത്. പുനലൂരില് നിന്ന് വന്ന ബസ്സിന്റെ ബ്രേക്ക് തകരാറിലായതാണ് അപകടകാരണം. ഈ ബസ്സ് മറ്റൊരു വാഹനത്തില് ഇടിക്കാന് ശ്രമിച്ചപ്പോള് വെട്ടിച്ച് മാറ്റുകയായിരുന്നു.
ഈ സമയം എതിരെ വന്ന കിളിമാനൂര് ബസ്സില് ഇടിച്ചു കയറുകയായിരുന്നു. അപകടത്തില് 50 ഓളം പേര്ക്ക് പരുക്കേറ്റു. പരുക്കേറ്റവരെ മെഡിക്കല് കോളജ് ആശുപത്രിയിലും സമീപത്തെ സ്വകാര്യ ആശുപത്രിയിലും പ്രവേശിപ്പിച്ചു. പരിക്കുകള് ഗുരുതരമല്ല. വട്ടപ്പാറ പോലീസ് സംഭവ സ്ഥലത്തെത്തി പരിശോധന നടത്തി.
