എറണാകുളം : ചോറ്റാനിക്കരയില് കാര് ട്രാന്സ്ഫോമറിലേക്ക് ഇടിച്ച് കയറ്റി. കുടുംബം സഞ്ചരിച്ച കാറിന്റെ ഡ്രൈവിങ് സീറ്റില് മദ്യലഹരിയില് അതിക്രമിച്ചു കയറിയ മദ്ധ്യവയസ്ക്കനാണ് അപകടം ഉണ്ടാക്കിയത്. അപകടത്തില് യുവതിയും രണ്ടര വസ്സുകാരിയായ മകളും രക്ഷപ്പെട്ടത് തലനാരിഴയ്ക്ക്. സംഭവത്തില് ചോറ്റാനിക്കര പൂച്ചക്കുഴി അരിമ്പൂര് ആഷ്ലിയെ (53) പോലീസ് അറസ്റ്റ് ചെയ്തു. ഇയാള് കൊലപാതകക്കേസിലെ പ്രതിയാണ്.
വട്ടുക്കുന്ന് സ്വദേശിയായ ശ്രീജിത്തും ഭാര്യയും മകളും രാത്രി സുഹൃത്തിന്റെ വീട്ടില് പോയി തിരിച്ച് വരികയായിരുന്നു. പിന്നാലെ ഭക്ഷണം വാങ്ങാന് ചോറ്റാനിക്കര ലൗ ലാന്ഡ് ബാറിനു സമീപത്ത് കാര് നിര്ത്തി. കുട്ടിയെ ഡ്രൈവിങ് സീറ്റില് ഇരുത്തിയാണ് ശ്രീജിത്ത് കാറില് നിന്ന് ഇറങ്ങി ഭക്ഷണം വാങ്ങാന് പോയത്. എന്നാല് ഈ സമയം അവിടെ എത്തിയ ആഷ്ലി കാറില് അതിക്രമിച്ച് കയറുകയായിരുന്നു. ഡ്രൈവിങ് സീറ്റിലുണ്ടായിരുന്ന കുട്ടിയെ പിന്നിലെ സീറ്റിലേക്ക് ഇരുത്തിയ ശേഷമാണ് ഇയാള് കാറില് കയറിയത്.
ഭാര്യ ബഹളം വച്ചതോടെ ശ്രീജിത്ത് ഓടിയെത്തിയെങ്കിലും ഇയാള് കാറുമായി പോവുകയായിരുന്നു. തുടര്ന്ന് നിയന്ത്രണം വിട്ട കാര് സമീപത്തെ പാനിപ്പൂരി കടയില് ഇടിച്ചു. ശേഷം 500 മീറ്ററോളം ഓടി റോഡരികിലെ ട്രാന്സ്ഫോമറിലേക്ക് ഇടിച്ചു കയറി. തുടര്ന്ന് ട്രാന്സ്ഫോമറിന്റെ സംരക്ഷണ വേലിയുടെ തറയില് തട്ടി കാര് നിന്നു. അപകടത്തില് യുവതിക്കും കുട്ടിക്കും പരുക്കേറ്റു. പിന്നാലെ ശ്രീജിത്തും നാട്ടുകാരും ചേര്ന്ന് ഇവരെ ആശുപത്രിയിലെത്തിച്ചു.
