പാലാ : കൊലപാതക കേസില് രണ്ടുപേര് അറസ്റ്റില്. നെച്ചിപ്പുഴൂര് വട്ടക്കാനത്തില് അജിത്ത് (30), ളാലം നെച്ചിപ്പുഴൂര് കൈത്തുംകര വിനീത് ( അനീഷ്-38) എന്നിവരെയാണ് അറസ്റ്റ് ചെയ്തത്. പാലാ പോലീസ് ആണ് അറസ്റ്റ് ചെയ്തത്. കഴിഞ്ഞദിവസം പ്രതികളായ ഇരുവരും കരൂര് രാജീവ് നഗര് ടിവി സെന്ററില് ഇരുന്നു മദ്യപിക്കുന്നതു കണ്ട സുനീഷ് ഇവിടെയിരുന്ന് മദ്യപിക്കാന് പാടില്ലെന്ന് പറഞ്ഞു. തുടര്ന്ന് ഇവര് തമ്മില് വാക്കേറ്റമുണ്ടായി. ഇതിനുശേഷം വീട്ടിലേക്ക് പോയ സുനീഷിനെ വീട്ടില് നിന്നു വലിച്ചിറക്കി വിറകുകമ്പ്കൊണ്ട് ആക്രമിക്കുകയായിരുന്നു.
ആന്തരികാവയവങ്ങള്ക്ക് ഗുരുതരമായി പരിക്കേറ്റ സുനീഷിനെ ആദ്യം പാലാ ജനറല് ആശുപത്രിയിലും പരിക്ക് ഗുരുതരമായതിനാല് കോട്ടയം മെഡിക്കല് കോളജിലും പ്രവേശിപ്പിച്ചെങ്കിലും മരിക്കുകയായിരുന്നു. ആക്രമണത്തിനുശേഷം ഒളിവില് പോയ പ്രതികളെ ജില്ലാ പോലീസ് ചീഫ് കെ. കാര്ത്തിക്കിന്റെ നേതൃത്വത്തിലുള്ള അന്വേഷണസംഘം ചിങ്ങവനം പാത്താമുട്ടത്തു നിന്നാണ് പിടികൂടിയത് .പാലാ ഡിവൈഎസ്പി ഗിരീഷ് പി. സാരഥി, പാലാ എസ്എച്ച്ഒ കെ.പി. തോംസണ്, എസ്ഐ എം.ഡി. അഭിലാഷ്, സിപിഒമാരായ രഞ്ജിത്ത്, ജോഷി മാത്യു, ജോജി ജോസഫ്, ജോസ് സ്റ്റീഫന് എന്നിവര് ചേര്ന്നാണ് പ്രതികളെ പിടികൂടിയത്. പ്രതികളെ കോടതിയില് ഹാജരാക്കി.
