തിരുവനന്തപുരം : മോഷ്ടിച്ച ബൈക്കുകളില് മാല പിടിച്ചുപറി നടത്തുന്ന രണ്ടംഗ സംഘം അറസ്റ്റില്. വള്ളക്കടവ് ഖദീജ മന്സിലില് ഷാരുഖ് ഖാന് (25), ബന്ധു വള്ളക്കടവ് ഖദീജ മന്സിലില് ഹാഷിം (36) എന്നിവരെയാണ് വട്ടിയൂര്ക്കാവ് പോലീസ് പിടികൂടിയത്. ആഗസ്റ്റ് ഒന്നിന് രാവിലെ അറപ്പുര ജങ്ഷനു സമീപം ബൈക്കിലെത്തിയ പ്രതികള് വഴിയാത്രക്കാരിയെ ആക്രമിച്ച് സ്വര്ണമാല പിടിച്ചു പറിച്ച് കടന്നുകളയുകയായിരുന്നു.
സ്പെഷല് ആക്ഷന് ഗ്രൂപ് എഗൈന്സ്റ്റ് ഓര്ഗനൈസ്ഡ് ക്രൈം ടീമിന്റെ സഹായത്തോടെയാണ് പ്രതികളെ പോലീസ് പിടികൂടിയത്. ആളറിയാതിരിക്കാന് ഹെല്മറ്റും ഓവര്കോട്ടും ധരിച്ച് മോട്ടോര് സൈക്കിളില് വന്ന് പിടിച്ചു പറി നടത്തിയ ഇവരെ കണ്ടെത്താന് സ്പെഷല് ടീം നൂറിലേറെ സി.സി ടി.വി ദൃശ്യങ്ങള് ശേഖരിച്ചു. മറ്റു ശാസ്ത്രീയ അന്വേഷണങ്ങളും നടത്തി. ഡെപ്യൂട്ടി പോലീസ് കമ്മീഷ്ണര് അജിത് കുമാറിന്റെ മേല്നോട്ടത്തില് നര്കോട്ടിക് സെല് എ.സി.പി ഷീന് തറയില്, വട്ടിയൂര്ക്കാവ് എസ്.എച്ച്. ഒ സുരേഷ് കുമാര് എന്നിവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.
