ചേര്ത്തല: ചേര്ത്തലയില് ദേശീയ പാതയില് നിര്ത്തിയിട്ടിരുന്ന ടോറസ് ലോറിക്ക് പിന്നില് കെഎസ്ആര്ടിസി ബസിടിച്ച് നിരവധി പേര്ക്ക് പരിക്ക്. ചേര്ത്തല അര്ത്തുങ്കല് ബൈപ്പാസ് ജംഗ്ഷനു സമീപം ഇന്ന് ഉച്ചയ്ക്ക് 12.30 ഓടെയായിരുന്നു അപകടം. ഗുരുതരമായി പരുക്കേറ്റ മൂന്നുപേരെ ആലപ്പുഴ മെഡിക്കല് കോളജില് പ്രവേശിപ്പിച്ചു. കുത്തിയതോട് കുന്നേല് സീനത്ത്(62), കോടംതുരുത്ത് തേജസില് സോന (43), മുഹമ്മ മറ്റത്തില് ആശ സുനീഷ് എന്നിവരെയാണ് മെഡിക്കല് കോളജില് ആശുപത്രിയില് പ്രവേശിപ്പിച്ചത്.
ഇന്ന് 12.10ന് ചേര്ത്തലയില് നിന്നും തോപ്പുംപടിയിലേക്ക് പുറപ്പെട്ട ബസാണ് അപകടത്തില്പെട്ടത്. ബസ് ഡ്രൈവര് ഇടക്കൊച്ചി സ്വദേശി ജയനും എറണാകുളം സ്വദേശിനിയായ കണ്ടക്ടര് അനിമോള്ക്കും തോളെല്ലിനും കാലിനും പരുക്കേറ്റിട്ടുണ്ട്. എറണാകുളം ഭാഗത്തുനിന്നും വരുകയായിരുന്ന ആംബുലന്സിനു സൈഡ് കൊടുക്കുന്നതിനിടെ നിയന്ത്രണം തെറ്റി ബസ് ലോറിക്ക് പിന്നിലിടിക്കുകയായിരുന്നുവെന്ന് പ്രദേശവാസികള് പറഞ്ഞു. ചേര്ത്തലയില് നിന്നും ഫയര്ഫോഴ്സും പോലീസും പ്രദേശവാസികളും ചേര്ന്നാണ് പരുക്കേറ്റവരെ ആശുപത്രിലെത്തിച്ചത്.
