കാക്കനാട് : വാഴക്കാലക്ക് സമീപം പടമുകളില് വാഹനാപകടത്തില് ഒമ്പതാം ക്ലാസ് വിദ്യാര്ഥി മരണപ്പെട്ട സംഭവത്തില് രണ്ടുപേര്ക്കെതിരെ മോട്ടോര് വാഹന വകുപ്പ് നടപടി സ്വീകരിച്ചു. ആലപ്പുഴ ചേര്ത്തല സ്വദേശി സവിന്, ഇടുക്കി സ്വദേശി ദിലീപ് കുമാര് എന്നിവര്ക്കെതിരെയാണ് നടപടി. ഇരുവരുടെയും ലൈസന്സ് താല്ക്കാലികമായി റദ്ദ് ചെയ്തതായി എറണാകുളം ആര്.ടി.ഒ അറിയിച്ചു. ജനുവരി മൂന്നാം തീയതിയായിരുന്നു സംഭവം.
കുണ്ടുവേലി ഓലിക്കുഴിയില് താമസിക്കുന്ന അബ്ദുല് സലാമിന്റെ മകന് കെ.എ. മുഹമ്മദ് അസ്ലമാണ് (14) മരണപ്പെട്ടത്. പടമുകള് പള്ളിയില്നിന്ന് മദ്റസ കഴിഞ്ഞ് വീട്ടിലേക്ക് മടങ്ങുകയായിരുന്ന അസ്ലമിന്റെ സൈക്കിളില് സവിന് ഓടിച്ചിരുന്ന ഓട്ടോ ഇടിക്കുകയായിരുന്നു. നിയന്ത്രണം നഷ്ടപ്പെട്ട സൈക്കിള് റോഡിലേക്ക് തെറിച്ചുവീഴുകയും അതേദിശയില് തന്നെയുണ്ടായിരുന്നു ടാങ്കര് ലോറി ദേഹത്തിലൂടെ കയറിയിറങ്ങുകയുമായിരുന്നു.
സംഭവത്തില് ഒന്നാം പ്രതിയായ ഓട്ടോ ഡ്രൈവര്ക്കെതിരെ മനഃപൂര്വമല്ലാത്ത നരഹത്യക്ക് പോലീസ് കേസെടുത്തിരുന്നു. മോട്ടോര് വെഹിക്കിള് ഇന്സ്പെക്ടറായ ജിനു ജോണിന്റെ നേതൃത്വത്തില് നടന്ന അന്വേഷണത്തിന് പിന്നാലെയാണ് സവിനും ടാങ്കര് ലോറി ഡ്രൈവറായ ദിലീപ് കുമാറിനുമെതിരെ നടപടിയെടുത്തത്. അപകടമുണ്ടായ സ്ഥലത്ത് ഇരുവരുമായി തെളിവെടുത്തിരുന്നു. ഇതിനു പുറമേ സമീപത്തെ സി.സി.ടി.വി ദൃശ്യങ്ങള് കൂടി സ്വീകരിച്ച് നടത്തിയ അന്വേഷണത്തിനൊടുവിലാണ് ലൈസന്സ് സസ്പെന്ഡ് ചെയ്യാന് അധികൃതര് തീരുമാനിച്ചത്.