കോഴിക്കോട് : ദേശീയപാതയിൽ ടാങ്കർ ലോറിക്ക് പിറകിൽ മറ്റൊരു ലോറിയിടിച്ച് മൂന്ന് പേർക്ക് ഗുരുതര പരിക്ക്. ഇന്ന് രാവിലെ എട്ടേകാലിന് പെരുമാൾപുരത്താണ് അപകടം നടന്നത്. കണ്ണൂർ ഭാഗത്തേക്ക് പോകുന്ന ടാങ്കർ ലോറിക്ക് പുറകിൽ അതേ ദിശയിൽ സഞ്ചരിക്കുന്ന മറ്റൊരു ലോറി ഇടിക്കുകയായിരുന്നു. പുറകിലെ ലോറിയിലുണ്ടായിരുന്ന മൂന്ന് പേർക്കാണ് ഗുരുതരമായി പരിക്കേറ്റത്.
നാട്ടുകാരും പോലീസും ചേർന്ന് ഏറെ നേരം ശ്രമിച്ചാണ് പരിക്കേറ്റ മൂന്നുപേരെയും പുറത്തെടുത്തത്. ഇവരെ ഉടൻ തന്നെ ആശുപത്രികളിലേക്ക് മാറ്റി. പയ്യോളി സി.ഐ കെ.സി സുഭാഷ് ബാബു, കെ.സജീഷ്, കെ.ടി രാജേഷ്, വടകര കൊയിലാണ്ടി ഫയർ സ്റ്റേഷനിൽ നിന്നുള്ള അഗ്നിശമനസേനാംഗങ്ങൾ എന്നിവർ രക്ഷാപ്രവർത്തനത്തിൽ പങ്കെടുത്തു. അപകടത്തെ തുടർന്ന് ദേശീയപാതയിൽ ഗതാഗത കുരുക്ക് അനുഭവപ്പെടുന്നുണ്ട്.