തിരുവനന്തപുരം: കിളിമാനൂരില് ഓട്ടോയില് കാറിടിച്ച് 67കാരി മരിച്ചു. പെരുമാതുറ സ്വദേശിനി സമീമ(67) ആണ് മരിച്ചത്. എം.സി റോഡില് കിളിമാനൂര് മണലേത്ത്പച്ചയില് ഓട്ടോയും കാറും കൂട്ടിയിടിച്ചുണ്ടായ അപകടത്തില് ഏഴുപേര്ക്ക് പരിക്കേല്ക്കുകയും ചെയ്തു. ഇന്നു രാവിലെ 10 മണിയോടെയായിരുന്നു അപകടം.
ഓട്ടോയില് സഞ്ചരിച്ചിരുന്ന പെരുമാതുറ സ്വദേശികളായ സവാദ് (43,ഡ്രൈവര്), ശുഹൈബ് (69), സജി (45), സോഫി (41), ഷഹദാന (29), സ്വാലിഹ (7),സുബ്ഹാന് (4) എന്നിവര്ക്ക് പരിക്കേറ്റു. കിളിമാനൂരില് നിന്ന് നിലമേല് ഭാഗത്തേക്ക് വരികയായിരുന്ന ഓട്ടോയില് എതിര് ദിശയില് നിന്ന് വന്ന കാര് നിയന്ത്രണംവിട്ട് ഇടിക്കുകയായിരുന്നു. ഉടന് തന്നെ നാട്ടുകാരും പോലീസും ചേര്ന്ന് ഓട്ടോയില് കുടുങ്ങിയവരെ പുറത്തെടുത്ത് വെഞ്ഞാറമൂട് ഗോകുലം മെഡിക്കല് കോളെജില് എത്തിച്ചു. എന്നാല് സമീമയുടെ ജീവന് രക്ഷിയ്ക്കാനായില്ല.