കൊട്ടാരക്കര : എം.സി റോഡില്‍ കൊട്ടാരക്കര മൈലത്ത് നിറുത്തിയിട്ട നാഷനല്‍ പെര്‍മിറ്റ് ലോറിയ്ക്ക് പിന്നില്‍ ബൈക്ക് ഇടിച്ച്‌ യുവാവിന് ദാരുണാന്ത്യം. തിരുവനന്തപുരം സ്വദേശി ശരത്ത് (കുട്ടൂസ് 24) ആണ് മരിച്ചത്. കൂടെയുണ്ടായിരുന്ന വിനീത്, ആദര്‍ശ് എന്നിവരെ ഗുരുതര പരുക്കുകളോടെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
ഒരാളുടെ നില ഗുരുതരമാണ്. ഇന്ന് പുലര്‍ച്ചെ 5.45 ന് ആയിരുന്നു സംഭവം. തിരുവനന്തപുരത്ത് നിന്നും പാലക്കാടുള്ള ജോലി സ്ഥലത്തേക്ക് ബൈക്കില്‍ വരികയായിരുന്നു മൂവര്‍ സംഘം. മൈലം എം.ജി.എം സ്‌കൂളിനും മൈലത്തിനും ഇടയിലായി റോഡരികില്‍ നിറുത്തിയിട്ടിരുന്നതാണ് ലോറി. വെളിച്ചക്കുറവുള്ള ഭാഗമാണ് ഇവിടം. ശരത്ത് ഓടിച്ചിരുന്ന ബൈക്ക് അമിത വേഗത്തിലെത്തി ലോറിയുടെ പിന്നിലേക്ക് ഇടിച്ചുകയറുകയായിരുന്നു. ഇടിയുടെ ആഘാതത്തില്‍ ബൈക്ക് തകര്‍ന്നു, ലോറിയുടെ പിന്‍ഭാഗത്തെ ആംഗ്‌ളയറടക്കം വളഞ്ഞു.
നാട്ടുകാര്‍ ഓടിയെത്തിയപ്പോള്‍ കഴുത്ത് ഒടിഞ്ഞുതൂങ്ങിയ നിലയിലായിരുന്നു ശരത്തിനെ മരിച്ച നിലയില്‍ കണ്ടെത്തിയത്.
കൊട്ടാരക്കര പോലിസെത്തി മൂവരെയും കൊട്ടാരക്കര താലൂക്ക് ആശുപത്രിയിലെത്തിച്ചു. ശരത്തിന്റെ മരണം സ്ഥിരീകരിച്ചശേഷം മറ്റ് രണ്ടുപേരെയും മെഡിക്കല്‍ കോളജ് ആശുപത്രിയിലേക്ക് മാറ്റുകയായിരുന്നു. കൊട്ടാരക്കര പോലിസ് കേസെടുത്തു.
