ബെംഗളൂരു : പ്രണയാഭ്യര്ഥന നിരസിച്ചതിനെ തുടര്ന്ന് 23 കാരിയായ യുവതിക്ക് നേരേ യുവാവിന്റെ ആസിഡ് ആക്രമണം. ബെംഗളൂരു കാമാക്ഷി പാളയ പോലീസ് സ്റ്റേഷന് പരിധിയിലായിരുന്നു സംഭവം. ഗുരുതരമായി പൊള്ളലേറ്റ യുവതിയെ സ്വകാര്യ ആശുപത്രിയില് പ്രവേശിപ്പിച്ചു. നാഗേഷ് എന്നയാളാണ് യുവതിക്ക് നേരേ ആസിഡൊഴിച്ചതെന്ന് പോലീസ് തിരിച്ചറിഞ്ഞിട്ടുണ്ട്. ഇയാള് നേരത്തെ യുവതിയോട് പ്രണയാഭ്യര്ഥന നടത്തിയിരുന്നു. എന്നാല് യുവതി ഇത് നിരസിച്ചു. ഇതിനു പിന്നാലെയാണ് യുവാവ് ആസിഡ് ആക്രമണം നടത്തിയതെന്നും പോലീസ് പറഞ്ഞു.
വ്യാഴാഴ്ച രാവിലെ യുവതി ജോലിക്ക് പോകവേ യുവാവ് തടഞ്ഞുനിര്ത്തി ആസിഡൊഴിക്കുകയായിരുന്നു. ഗുരുതരമായി പൊള്ളലേറ്റ യുവതിയെ കാമാക്ഷിപാളയ പോലീസ് എത്തിയാണ് ആശുപത്രിയിലേക്ക് മാറ്റിയത്. ആക്രമണത്തിന് ശേഷം രക്ഷപ്പെട്ട പ്രതിക്കായി തിരച്ചില് തുടരുകയാണെന്നും പോലീസ് പറഞ്ഞു.