മലപ്പുറം : സമസ്ത പ്രസിഡന്റ് ജിഫ്രി കോയ തങ്ങള്ക്കെതിരെ അധിക്ഷേപകരമായ പോസ്റ്റിട്ട വയനാട് മുസ്ലിം ലീഗ് ജില്ലാ സെക്രട്ടറി യഹ്യ ഖാന് തലയ്ക്കലിനെതിരെ നടപടിയെടുത്ത് മുസ്ലിം ലീഗ് നേതൃത്വം. ജില്ലാ സെക്രട്ടറി സ്ഥാനത്തു നിന്നും യഹ്യ ഖാനെ നീക്കം ചെയ്തതായി മുസ്ലിം ലീഗ് അറിയിച്ചു. വയനാട് എസ് കെ എസ് എസ് എഫ് ജില്ലാ നേതൃത്വം ഇദ്ദേഹത്തിനെതിരെ പരാതിയുമായി രംഗത്തു വന്നിരുന്നു. ഈ സാഹചര്യത്തിലാണ് മുസ്ലിം ലീഗിന്റെ നടപടി.
വഖഫ് ബോര്ഡ് നിയമനം പി.എസ്.സി ക്ക് വിട്ടതുമായി ബന്ധപ്പെട്ട് പള്ളിയില് ബോധവല്ക്കരണം നടത്തണമെന്ന ലീഗ് നിലപാടിന് വിരുദ്ധമായ തീരുമാനം സമസ്ത കൈക്കൊണ്ടിരുന്നു. സമസ്തയുടെ നിലപാട് ലീഗിനെ പ്രതിസന്ധിയിലാക്കുകയും ചെയ്തു. ഈ വിഷയത്തില് മുസ്ലിം സമുദായത്തിന്റെ ആശങ്ക അകറ്റുമെന്ന് മുഖ്യമന്ത്രി പിണറായി വിജയന് നേരത്തെ സമസ്തയെ അറിയിച്ചിരുന്നു.
