കൊച്ചി : നടിയെ ആക്രമിച്ച കേസില് നടന് ദിലീപിനെ ഉടന് ചോദ്യം ചെയ്തേക്കും. സംവിധായകന് ബാലചന്ദ്രകുമാറിന്റെ വെളിപ്പെടുത്തലിന്റെ പശ്ചാത്തലത്തിലാണ് പോലീസ് നീക്കം. പള്സര് സുനിയെയും ചോദ്യം ചെയ്തേക്കും. ഇതിനായി വിചാരണ കോടതിയുടെ അനുമതി തേടും. സുനിയെ ചോദ്യം ചെയ്തതിന് ശേഷമായിരിക്കും നടനെ ചോദ്യം ചെയ്യുക. നിലവില് ജുഡീഷ്യല് കസ്റ്റഡിയിലാണ് പള്സര് സുനി. നടിയെ ആക്രമിച്ച കേസില് തുടരന്വേഷണം വേഗത്തിലാക്കാനാണ് പോലീസിന് ലഭിച്ച നിര്ദേശം.
ബാലചന്ദ്രകുമാറിന്റെ മൊഴിയില് പ്രധാനമായും പള്സര് സുനിയും ദിലീപും തമ്മിലുള്ള ബന്ധമാണ് പരാമര്ശിക്കുന്നത്. സംവിധായകന്റെ മൊഴി കോടതിയില് രേഖപ്പെടുത്തിയിട്ടുണ്ട്. കേസന്വേഷണത്തിനായി പ്രത്യേക സംഘം നിയോഗിക്കുമെന്നാണ് വിവരം. ഇത് സംബന്ധിച്ച തീരുമാനം സംസ്ഥാന പോലീസ് മേധാവി അറിയിക്കും. ഈ മാസം 20നകം അന്വേഷണ റിപ്പോര്ട്ട് സമര്പ്പിക്കണമെന്നാണ് നിര്ദേശം.
