കൊച്ചി : ദിലീപുമായി തനിക്ക് യാതൊരു ബന്ധവുമില്ലെന്ന് നടിയെ ആക്രമിച്ച കേസില് നാലാം പ്രതി വിജീഷ്. പള്സര് സുനിയുമായി സൗഹൃദമുണ്ടായിരുന്നു.
എന്നാല് ഈ കേസിനെപ്പറ്റി ഒന്നും അറിയില്ലെന്നും വിജീഷ് പറഞ്ഞു. നടിയെ ആക്രമിച്ച കേസിലെ നാലാം പ്രതി വിജീഷിന് ഹൈക്കോടതി ജാമ്യം അനുവദിച്ചതിന് പിന്നാലെ ഒന്നാം പ്രതി പള്സര് സുനി സുപ്രീംകോടതിയെ സമീപിച്ചിരുന്നു. ഹൈക്കോടതി ജാമ്യാപേക്ഷ നിരസിച്ചതിന് പിന്നാലെയാണ് പള്സര് സുനി സുപ്രീംകോടതിയെ സമീപിച്ചത്. താനൊഴികെ കേസിലെ എല്ലാ പ്രതികള്ക്കും ജാമ്യം ലഭിച്ചെന്നും തുടരന്വേഷണം നടക്കുന്നതിനാല് കേസിലെ വിചാരണ നടപടികള് നീണ്ടുപോകുമെന്നും ആ നിലയ്ക്ക് തനിക്ക് ജാമ്യം അനുവദിക്കണമെന്നുമാണ് പ്രതിയുടെ ആവശ്യം.
നടിയെ ആക്രമിച്ച കേസില് ദിലീപിന്റെ സഹോദരന് അനൂപിനെയും സഹോദരീ ഭര്ത്താവ് സുരാജിനെയും ചോദ്യം ചെയ്യാനൊരുങ്ങുകയാണ് ക്രൈംബ്രാഞ്ച്. കേസിലെ സാക്ഷിയായ ബാലചന്ദ്രകുമാര് നല്കിയ ശബ്ദ സംഭാഷണങ്ങളില് ഇരുവരുടെയും സാന്നിധ്യം ഉള്ളതിനാലാണ് ചോദ്യം ചെയ്യല്. അനൂപിന്റെയും സുരാജിന്റെയും ചോദ്യം ചെയ്യലിന് ശേഷമാകും കാവ്യാമാധവനെ ചോദ്യം ചെയ്യുക. കേസിന്റെ തുടരന്വേഷണ റിപ്പോര്ട്ട് ഏപ്രില് 15 ന് സമര്പ്പിക്കാനാണ് കോടതി നിര്ദേശം. എന്നാല് അന്തിമ റിപ്പോര്ട്ട് സമര്പ്പിക്കാന് ഇനിയും സമയം വേണമെന്ന നിലപാടിലാണ് ക്രൈംബ്രാഞ്ച്. അന്വേഷണ പുരോഗതി റിപ്പോര്ട്ട് സമര്പ്പിച്ച് തുടരന്വേഷണത്തിന് കൂടുതല് സമയം തേടാനാണ് തീരുമാനം.
അതിനിടെ അന്വേഷണ ഉദ്യോഗസ്ഥരെ അപായപ്പെടുത്താന് ഗൂഡാലോചന നടത്തിയ കേസില് തിരിച്ചെടുക്കാന് കഴിയാത്ത വിധം ഫോണ് രേഖകള് ദിലീപ് നശിപ്പിച്ചുവെന്ന് ക്രൈംബ്രാഞ്ച്ര് കണ്ടെത്തി. ഷാര്ജ ക്രിക്കറ്റ് അസോസിയേഷന് സിഇഒ ഗാലിഫുമായുള്ള ചാറ്റുകള് പൂര്ണമായും നീക്കം ചെയ്തു. മലപ്പുറം സ്വദേശി ജാഫര്, തൃശൂര് സ്വദേശി നസീര്, എന്നിവരുടേതുള്പ്പെടെ 12 ചാറ്റുകളാണ് ദിലീപ് നശിപ്പിച്ചത്. ദിലീപുമായി നിരവധി സാമ്പത്തിക ഇടപാടുകളുള്ള വ്യക്തിയാണ് ഗാലിഫ്. ഇയാള് സിനിമാ മേഖലയിലും നിക്ഷേപം നടത്തിയിട്ടുണ്ട്.
