ആലുവ: നടി അന്ന രാജനെ സ്വകാര്യ ടെലികോം സ്ഥാപനത്തില് പൂട്ടിയിട്ടതായി പരാതി. സിം കാര്ഡ് എടുക്കാനായി എത്തിയപ്പോഴാണ് നടിയെ ജീവനക്കാര് പൂട്ടിയിട്ടത്. വൈകുന്നേരം 4.45ന് ആലുവയിലെ വി.ഐ ടെലികോം ഓഫീസിലാണ് സംഭവം. സിം കാര്ഡ് എടുക്കുന്നതുമായി ബന്ധപ്പെട്ട് അന്ന രാജനും ജീവനക്കാരും തമ്മില് തര്ക്കമുണ്ടായെന്നും ഇതാണ് പൂട്ടിയിടാന് കാരണമെന്നുമാണ് വിവരം. സംഭവവുമായി ബന്ധപ്പെട്ട് അന്ന രാജന് പോലീസില് പരാതി നല്കിയിട്ടുണ്ട്. വിശദമായ അന്വേഷണത്തിന് ശേഷം മാത്രമേ കൂടുതല് കാര്യങ്ങള് പറയാനാകൂവെന്ന് പോലീസ് അറിയിച്ചു.
‘അങ്കമാലി ഡയറീസ്’ എന്ന ചിത്രത്തിലെ ലിച്ചിയായി വന്ന് പ്രേക്ഷക ഹൃദയം കീഴടക്കിയ നടിയാണ് അന്ന രേഷ്മ രാജന്. 2017ല് അങ്കമാലി ഡയറീസിലൂടെയാണ് അന്ന സിനിമയില് അരങ്ങേറ്റം കുറിച്ചത്. പിന്നീട് വെളിപാടിന്റെ പുസ്തകം, ലോനപ്പന്റെ മാമ്മോദിസ, മധുര രാജ, സ്വര്ണമത്സ്യങ്ങള്, അയ്യപ്പനും കോശിയും തുടങ്ങിയ ചിത്രങ്ങളില് വേഷമിട്ടു. സിനിമയിലെത്തുന്നതിന് മുമ്പ് അന്ന രേഷ്മ രാജന് കൊച്ചിയിലെ ഒരു സ്വകാര്യ ആശുപത്രിയില് നേഴ്സായിരുന്നു.
