അടൂർ: അടുത്തിടെ നവീകരിച്ച അടൂർ-ശാസ്താംകോട്ട സംസ്ഥാന പാത തകർച്ചയിൽ. സംഭവം ശ്രദ്ധയിൽപ്പെടുത്തിയിട്ടും അധികൃതർ തിരിഞ്ഞു നോക്കുന്നില്ലെന്ന് പ്രദേശ വാസികളുടെ പരാതി. വെള്ളക്കുളങ്ങര കനാൻ നഗർ കഴിഞ്ഞ് നെല്ലിമൂട്ടിൽപടിയിലേക്ക് വരുന്ന ഭാഗത്ത് ഇടതു വശത്ത് കൊടുംവളവിലാണ് ടാറിങ് അവസാനിക്കുന്ന ഭാഗം ഇടിയുന്നത്.
കൊടുംവളവായതിനാൽ വാഹനങ്ങൾക്ക് റോഡ് തകർന്നത് അടുത്തെത്തുമ്പോൾ മാത്രമാണ് കാണാനാകുക. കൂടുതൽ ടാറിങ് തകരാൻ സാധ്യതയുള്ളതിനാൽ അപകട സാദ്ധ്യത വർധിക്കാൻ സാധ്യത ഉണ്ടെന്നാണ് പ്രദേശവാസികൾ പറയുന്നത്. ചവറ, കൊല്ലം എന്നിവിടങ്ങളിലേക്കും മണ്ണടിയിലേക്കുമുള്ള റോഡായതിനാൽ നിരവധി വാഹനങ്ങളാണ് ഇതുവഴി പോകുന്നത്. എത്രയും പെട്ടെന്ന് വേണ്ട നടപടികൾ സ്വീകരിക്കണമെന്നാണ് പ്രദേശവാസികളുടെ ആവശ്യം.
