റാന്നി: വടശ്ശേരിക്കര ബംഗ്ലാംകടവ് ഗവ. യുപി സ്കൂളിൻ്റെ പുതിയ കെട്ടിടത്തിന് ഭരണാനുമതിയായതായി അഡ്വ. പ്രമോദ് നാരായൺ എംഎൽഎ അറിയിച്ചു. സ്കൂളിന് പുതിയ കെട്ടിടം നിർമ്മിക്കുന്നതിനായി എംഎൽഎയുടെ അഭ്യർത്ഥനപ്രകാരം വിദ്യാഭ്യാസ വകുപ്പ് 1 കോടി രൂപയാണ് അനുവദിച്ചിരിക്കുന്നത്. വടശ്ശേരിക്കരയിൽ പമ്പാ നദിയും കല്ലാറും ചേരുന്ന ഭാഗത്തിന് എതിർഭാഗയി ബംഗ്ലാംകടവ് – ഇട്ടിയപ്പാറ റോഡിനരികിലായി സ്ഥിതി ചെയ്യുന്ന സ്കൂൾ വടശ്ശേരിക്കരയിലെ ആദ്യകാല സ്കൂളുകളിൽ ഒന്നാണ്. ഇപ്പോൾ നൂറോളം കുട്ടികൾ പഠിക്കുന്ന സ്കൂളിൽ ഒന്നു മുതൽ ഏഴ് വരെ ക്ലാസ്സുകളാണ് ഉള്ളത്.
കാലപ്പഴക്കം ചെന്ന സ്കൂൾ കെട്ടിടത്തിന് പകരം പുതിയ കെട്ടിടം നിർമ്മിക്കണമെന്ന് ആവശ്യം പിടിഎ പ്രതിനിധികളും അധ്യാപകരുമാണ് എംഎൽഎയുടെ ശ്രദ്ധയിൽപ്പെടുത്തിയത്. ഇതിൻറെ അടിസ്ഥാനത്തിലാണ് ഇപ്പോൾ ഫണ്ട് അനുവദിച്ചിരിക്കുന്നത്.5 ക്ലാസ് മുറികളും മുകളിലെ നിലയിലേക്കുള്ള പടിക്കെട്ടുകളും ടോയ്ലറ്റ് സംവിധാനങ്ങളും ഉൾപ്പെടെ ആധുനിക രീതിയിലുള്ള സ്കൂൾ കെട്ടിടമാണ് ഇനി നിർമ്മിക്കുന്നത്. സാങ്കേതിക അനുമതി കൂടി ലഭിച്ചാൽ ഉടൻ നിർമ്മാണം ടെൻഡർ ചെയ്യാനാകും.
