ദില്ലി: കോണ്ഗ്രസ് സ്ഥാനാര്ത്ഥി നിര്ണ്ണയത്തില് അന്തിമ വട്ട ചര്ച്ചകള് ദില്ലിയില് പുരോഗമിക്കുമ്പോള് എംപിമാര് മത്സരിക്കേണ്ടതില്ലെന്ന പാര്ട്ടി ധാരണ തള്ളി കെ സുധാകരനും അടൂര് പ്രകാശും. ആരും സ്വയം സ്ഥാനാര്ത്ഥിയാകേണ്ടെന്നും സ്ഥാനാര്ത്ഥിത്വം സ്വയം പ്രഖ്യാപിച്ചാല് ശാസന നേരിടേണ്ടി വരുമെന്നും കെപിസിസി അധ്യക്ഷന് സണ്ണി ജോസഫും പ്രതിപക്ഷ നേതാവ് വിഡി സതീശനും തിരിച്ചടിച്ചു. സുധാകരന് അനുകൂലികള് കെപിസിസിയിലേക്ക് പ്രകടനം നടത്തുമെന്ന് പ്രഖ്യാപിച്ചതോടെ സുധാകരനെ അനുനയിപ്പിക്കാന് സണ്ണി ജോസഫ് തന്നെ ഇടപെട്ടു.
സ്ഥാനാര്ത്ഥി പട്ടികക്ക് അന്തിമ രൂപം നല്കാന് ദില്ലിയില് ചര്ച്ചകള് പുരോഗമിക്കുമ്പോഴാണ് സ്വയം സ്ഥാനാര്ത്ഥിത്വം പ്രഖ്യാപിച്ചുള്ള കെ സുധാകരന്റെ നീക്കവും സമുദായ സംഘടന വഴിയുള്ള അടൂര് പ്രകാശിന്റെ സമ്മര്ദ്ദവും. കണ്ണൂരില് സ്ഥാനാര്ത്ഥിയാകുമെന്ന് പ്രഖ്യാപിച്ച സുധാകരന് ധര്മ്മടത്ത് പിണറായിക്കെതിരെ വേണമെങ്കിലും മത്സരിക്കാന് സന്നദ്ധനാണെന്ന് ആത്മവിശ്വാസം പ്രകടിപ്പിച്ചു കഴിഞ്ഞു. പാര്ട്ടി പറഞ്ഞാല് മത്സരിക്കുമെന്ന് അടൂര് പ്രകാശും വ്യക്തമാക്കി. മത്സരിക്കേണ്ടെന്ന ധാരണ മറികടക്കാനുള്ള എംപിമാരുടെ നീക്കത്തെിന് കെപിസിസി തടയിട്ടു.
