ദില്ലി: അപകീര്ത്തിക്കേസില് കോണ്ഗ്രസ് നേതാവ് രാഹുല് ഗാന്ധി കുറ്റക്കാരനെന്ന കോടതി വിധിയെ നിയമപരമായി നേരിടുമെന്ന് കോണ്ഗ്രസ്. വിധിക്കെതിരെ മേല്ക്കോടതിയെ സമീപിക്കുമെന്ന് എഐസിസി വ്യക്തമാക്കി. വിമര്ശനങ്ങളെ കേന്ദ്രം ഭയപ്പെടുന്നു എന്നതിന് തെളിവായാണ് രാഹുലിനെതിരായ വിധിയെ കാണുന്നതെന്നും എഐസിസി വ്യക്തമാക്കി. മുതിര്ന്ന കോണ്ഗ്രസ് നേതാക്കളായ ജയറാം രമേഷ്, മനു അഭിഷേക് സിംഗ്വി എന്നിവരാണ് ഇക്കാര്യം അറിയിച്ചത്.
അതേസമയം രാഹുലിനെ ഭയപ്പെടുത്താന് സംവിധാനങ്ങളെല്ലാം ഒരുമിച്ചെന്ന് പ്രിയങ്ക ഗാന്ധി പ്രതികരിച്ചു. നിര്ഭയനായ രാഹുലിന് പൂര്ണ പിന്തുണയെന്ന് കെ.സി.വേണുഗോപാല് എംപി പറഞ്ഞു. ജഡ്ജിയെ മാറ്റിയതടക്കമുള്ള ഇടപെടലുകള് നടന്നിട്ടുണ്ടെന്നും വേണുഗോപാല്. പ്രതിപക്ഷ നേതാക്കളെ ഇല്ലാതാക്കാനുളള ശ്രമമെന്ന് കേജ്രിവാള് പറഞ്ഞു. രാഹുല് കോണ്ഗ്രസിനുതന്നെ തലവേദനയെന്ന് കേന്ദ്ര നിയമമന്ത്രിയുടെ വിമര്ശനം.
