ദുബൈ: ഖത്തര് ആതിഥ്യമരുളുന്ന ലോകകപ്പ് ഫുട്ബോളിന്റെ ഭാഗമായി എയര് ഇന്ത്യ യു.എ.ഇയിലേക്ക് കൂടുതല് വിമാന സര്വീസ് നടത്തിയേക്കും. കളി നടക്കുന്നത് ഖത്തറിലാണെങ്കിലും നിരവധി ഫുട്ബോള് ആരാധകര് ഇടത്താവളമായി ദുബൈ തെരഞ്ഞെടുക്കുമെന്നത് മുന്നില്കണ്ടാണ് സര്വീസ് നടത്തുന്നത്. ഇന്ത്യയില്നിന്ന് ഖത്തറിലേക്കും കൂടുതല് സര്വീസ് നടത്താന് എയര് ഇന്ത്യക്ക് പദ്ധതിയുണ്ട്.
15 ലക്ഷം സന്ദര്ശകരെയാണ് ഖത്തര് പ്രതീക്ഷിക്കുന്നത്. എന്നാല് ഇത്രയേറെ പേര്ക്ക് ഒരേസമയം താമസിക്കാനുള്ള സൗകര്യം ചെറിയ രാജ്യമായ ഖത്തറിലില്ല. ഈ സാഹചര്യത്തില് നല്ലൊരു ശതമാനം കാണികളും ദുബൈയില് താമസിക്കാന് എത്തുമെന്നാണ് കരുതുന്നത്. ദുബൈയില്നിന്ന് വിമാനമാര്ഗം ഒരു മണിക്കൂറില് ഖത്തറില് എത്താം. ഇവിടെനിന്ന് ഷട്ട്ല് സര്വീസ് പോലെ വിമാനങ്ങള് സര്വീസ് നടത്തുമെന്നും അധികൃതര് അറിയിച്ചിട്ടുണ്ട്. കൊല്ക്കത്തക്കും ദുബൈക്കുമിടിയില് ആഴ്ചയില് നാലു വിമാന സര്വീസുകള് നടത്താനാണ് പദ്ധതി.
പുതിയ എയര്ബസ് എ 320 ആയിരിക്കും ഇതിനായി ഉപയോഗിക്കുക. 150 ഇക്കോണമി ക്ലാസും 12 ബിസിനസ് ക്ലാസും ഇതിലുണ്ട്. നിലവില് 69 സര്വീസുകള് ആഴ്ചയില് നടക്കുന്നുണ്ട്. ഇതിനുപുറമെയാണ് പുതിയ സര്വീസുകള്. ലോകകപ്പിന് മുന്നോടിയായി ദുബൈയിലെ ഹോട്ടലുകളില് ബുക്കിങ്ങും വ്യാപകമാണ്. ലോകകപ്പില് പങ്കെടുക്കുന്ന രാജ്യങ്ങളിലെ ഫാന്സാണ് പ്രധാനമായും ദുബൈയില് ഹോട്ടലുകള് ബുക്ക് ചെയ്യുന്നത്. വിസ ലഭിക്കാന് എളുപ്പമാണെന്നതും ദുബൈയെ പ്രിയപ്പെട്ട കേന്ദ്രമാക്കുന്നു. വിനോദ സഞ്ചാരം കൂടി ലക്ഷ്യമിട്ടാണ് ഇവര് ദുബൈയിലേക്ക് എത്തുന്നത്. ലോകകപ്പുമായി ബന്ധപ്പെട്ട് ദുബൈയില് നിരവധി കാണികള് എത്തുമെന്ന് ഫിഫ പ്രസിഡന്റ് ഇന്ഫന്റിനോ പറഞ്ഞിരുന്നു.
