തിരുവനന്തപുരം: എ കെ ജി സെന്ററിലേക്ക് സ്ഫോടകവസ്തു എറിഞ്ഞതില് ഒരു യൂത്ത്കോണ്ഗ്രസ് നേതാവിനുകൂടി പങ്കുണ്ടെന്ന് അന്വേഷകസംഘം. ഉന്നതനേതാക്കളുമായി അടുത്ത ബന്ധം പുലര്ത്തുന്ന ഇയാളാണ് പ്രതിയായ യൂത്ത്കോണ്ഗ്രസ് മണ്ഡലം പ്രസിഡന്റ് ജിതിനെ രക്ഷപ്പെടാന് സഹായിച്ചതെന്ന് പോലീസ് പറയുന്നു. കോണ്ഗ്രസ് ഉന്നത നേതൃത്വത്തിന്റെ അറിവോടെയാണ് ആക്രമണം നടന്നതെന്ന് വ്യക്തമാക്കുന്നതാണ് കേസിലെ പുതിയ വഴിത്തിരിവ്.
അറസ്റ്റിലായ ജിതിന് അന്വേഷണത്തോട് സഹകരിക്കുന്നില്ല. ചോദ്യങ്ങള്ക്ക് കൃത്യമായി മറുപടിയും നല്കുന്നില്ല. കഞ്ചാവ് കേസില് കുടുക്കുമെന്ന് ഭീഷണിപ്പെടുത്തിയാണ് കുറ്റസമ്മതം നടത്തിച്ചതെന്ന് വൈദ്യപരിശോധനയ്ക്ക് ഹാജരാക്കുന്നതിനിടെ ജിതിന് മാധ്യമപ്രവര്ത്തകരോട് പറഞ്ഞു. കേസിലെ പ്രധാന തൊണ്ടിമുതലായ സ്കൂട്ടറും ആക്രമണസമയത്ത് ധരിച്ച വസ്ത്രവും ഷൂസും എവിടെയെന്ന് ഇയാള് ഇനിയും വ്യക്തമാക്കിയിട്ടില്ല. കെപിസിസി നേതൃത്വമാണ് പ്രതിക്ക് പിന്തുണയേകുന്നതെന്ന് പൊലീസ് കരുതുന്നു. പിടിയിലാകുമെന്ന് ഉറപ്പായ പ്രതി തൊണ്ടിമുതലുകള് നശിപ്പിക്കാനുള്ള സാധ്യതയും അന്വേഷകസംഘം തള്ളുന്നില്ല.
