ആലപ്പുഴ : പോലീസ് ക്വാര്ട്ടേഴ്സില് മക്കളെ കൊന്ന് അമ്മ ആത്മഹത്യ ചെയ്ത സംഭവത്തില് ഭര്ത്താവും പോലീസ് ഉദ്യോഗസ്ഥനുമായ റെനീസിനെതിരെ റിമാന്ഡ് റിപ്പോര്ട്ട്. റെനീസിന്റെ പീഡനമാണ് നജ്ലയുടേയും കുഞ്ഞുങ്ങളുടേയും മരണത്തിലേക്ക് നയിച്ചതെന്നാണ് കണ്ടെത്തല്. കൂടുതല് സ്ത്രീധനം ആവശ്യപ്പെട്ട് നജ്ലയെ റെനീസ് നിരന്തരമായി പീഡിപ്പിച്ചിരുന്നു. വിവാഹ സമയത്ത് 40 പവനും 10 ലക്ഷം രൂപയും പള്സര് ബൈക്കുമാണ് റെനീസിന് നജ്ലയുടെ വീട്ടുകാര് സ്ത്രീധനമായി കൊടുത്തത്. എന്നാല് കൂടുതല് സ്ത്രീധനം ആവശ്യപ്പെട്ട് നജ്ലയെ റെനീസ് മര്ദ്ദിക്കുകയും പീഡിപ്പിക്കുകയും ചെയ്തു.
പലപ്പോഴും വീട്ടിലേക്കും തിരിച്ചയച്ചു. ഇതോടെ നജ്ലയുടെ വീട്ടുകാര് 20 ലക്ഷം രൂപ കൂടി റെനീസിന് നല്കി. നജ്ലയെ സ്വന്തമായി മൊബൈല് ഫോണ് ഉപയോഗിക്കാന് റെനീസ് അനുവദിച്ചിരുന്നില്ല. റെനീസ് പുറത്ത് പോകുമ്ബോഴെല്ലാം നജ്ലയെ മുറിയില് പൂട്ടിയിട്ടിരുന്നതായും റിമാന്ഡ് റിപ്പോര്ട്ടില് പറയുന്നു. പുറം ലോകവുമായി ബന്ധപ്പെടാന് നജ്ലയെ റെനീസ് അനുവദിച്ചില്ല. പല സ്ത്രീകളുമായും ഇയാള്ക്ക് അടുത്ത ബന്ധമാണ് ഉണ്ടായിരുന്നത്. ബന്ധുവായ ഒരു സ്ത്രീയെ കല്യാണം കഴിക്കാന് ഇയാള് താത്പര്യം പ്രകടിപ്പിച്ചിരുന്നു. ഇതിന്റെ പേരില് നജ്ലയില് റെനീസ് സമ്മര്ദ്ദം ചെലുത്തി. കടുത്ത ശാരീരിക മാനസിക പീഡനങ്ങളാണ് റെനീസില് നിന്നും നജ്ലയ്ക്ക് അനുഭവിക്കേണ്ടി വന്നതെന്നും, ഇതാണ് ആത്മഹത്യയിലേക്ക് നയിച്ചതെന്നും റിമാന്ഡ് റിപ്പോര്ട്ടില് പറയുന്നു.