ചെന്നൈ: ഇന്ത്യ മുന്നണി കലുഷിതമായ സാഹചര്യത്തില് കക്ഷി നേതാക്കളോട് ഒന്നിച്ചുനില്ക്കാന് ആഹ്വാനം ചെയ്ത് തമിഴ്നാട് മുഖ്യമന്ത്രി എം.കെ. സ്റ്റാലിന് രംഗത്ത്. ബി.ജെ.പിക്കെതിരായ വോട്ടുകള് ഭിന്നിച്ചുപോകുന്നില്ല എന്ന് ഉറപ്പാക്കണമെന്ന് സ്റ്റാലിന് നേതാക്കളോട് ആവശ്യപ്പെട്ടു. ബി.ജെ.പിയെ അധികാരത്തില് നിന്ന് പുറത്താക്കുക എന്നതാകണം എല്ലാവരുടേയും ലക്ഷ്യമെന്നും തിരുച്ചിറപ്പള്ളിയില് നടന്ന പരിപാടിയില് സ്റ്റാലിന് വ്യക്തമാക്കി.
ബീഹാര്, ബംഗാള്, പഞ്ചാബ് സംസ്ഥാനങ്ങളുമായി ബന്ധപ്പെട്ട് ഇന്ത്യാ മുന്നണിയില് പ്രശ്നങ്ങള് നിലനില്ക്കുന്ന സാഹചര്യത്തിലാണ് സ്റ്റാലിന്റെ ആഹ്വാനം. ബീഹാറില് നിതീഷ് കുമാര് ഇന്ത്യ മുന്നണി വിട്ട് എന്.ഡി.എയുമായി കൈകോര്ത്ത് സര്ക്കാര് രൂപീകരിക്കുമോ എന്നതില് സസ്പെന്സ് തുടരുകയാണ്. ബി.ജെ.പി. പിന്തുണയോടെ നിതീഷ് വീണ്ടും മുഖ്യമന്ത്രിയായി ഞായറാഴ്ച സത്യപ്രതിജ്ഞ ചെയ്യുമെന്നാണ് നിലവിലെ റിപ്പോര്ട്ടുകള് പുറത്തുവരുന്നത്.
