തിരുവനന്തപുരം: കോവിഡ് വ്യാപനത്തില് സര്ക്കാര് വീണ്ടും സര്വ്വകക്ഷിയോഗം വിളിച്ചു. ചൊവ്വാഴ്ച വൈകീട്ട് നാല് മണിക്കാണ് യോഗം. കോവിഡ് വ്യാപനം രൂക്ഷമായ സാഹചര്യത്തില് സ്വീകരിക്കേണ്ട നിയന്ത്രണനടപടികള് ചര്ച്ച ചെയ്യാനാണ് യോഗം വിളിച്ചിട്ടുള്ളത്.
ദിനംപ്രതി കോവിഡ് ബാധിതരുടെ എണ്ണം കൂടിവരുന്ന സാഹചര്യത്തില് കടുത്ത നിയന്ത്രണങ്ങള് ഏര്പ്പെടുത്തുന്ന കാര്യമായിരിക്കും യോഗം ചര്ച്ച ചെയ്യുക. വരുംദിവസങ്ങളില് രോഗബാധിതരുടെ എണ്ണം 10,000ത്തിലെത്താന് സാധ്യതയുണ്ടെന്നാണ് വിലയിരുത്തല്. അങ്ങനെയെങ്കില് ലോക്ഡൗണിലേക്ക് പോകണമോയെന്നതും ചര്ച്ച ചെയ്യും. കഴിഞ്ഞ തവണ ലോക്ഡൗണ് എന്ന ആശയത്തെ പ്രതിപക്ഷ കക്ഷികള് എതിര്ത്തിരുന്നുവെങ്കിലും ഇത്തവണ അതുണ്ടായേക്കില്ലെന്നാണ് സൂചന.
മിക്ക ജില്ലകളിലും കോവിഡ് വ്യാപനം അതിരൂക്ഷമായ സാഹചര്യത്തില് ഇന്ന് വൈകീട്ട് ഉന്നത ഉദ്യോഗസ്ഥരുടെ യോഗം വിളിച്ചിട്ടുണ്ട്. ജില്ലാ കലക്ടര്മാര്, ജില്ലാ പോലീസ് മേധാവിമാര്, ഡി.ജി.പി, ആരോഗ്യ വിദഗ്ധര് തുടങ്ങിയവരാണ് യോഗത്തില് സംബന്ധിക്കുക.
പൊതുഗതാഗതം നിരോധിക്കണമെന്നും സ്വകാര്യ വാഹനയാത്ര നിയന്ത്രിക്കണമെന്നും സര്ക്കാരിനോട് തിരുവനന്തപുരം ജില്ലാഭരണകൂടം ആവശ്യപ്പെട്ടിട്ടുണ്ട്. തിരുവനന്തപുരത്ത് സ്ഥിതി ഗുരുതരമാണെന്നും, ജില്ലയിലെ രണ്ട് താലൂക്കുകള് അടച്ചിടണമെന്നും ജില്ലാ ഭരണകൂടം നിര്ദേശം മുന്നോട്ടുവെച്ചിട്ടുണ്ട്.
മുഖ്യമന്ത്രി ബന്ധപ്പെട്ടിരുന്നതായും ലോക്ഡൗണ് ഏര്പ്പെടുത്തിയാല് സഹകരിക്കുമെന്നും പ്രതിപക്ഷ നേതാവ് രമേശ് ചെന്നിത്തല വ്യക്തമാക്കി. കോവിഡ് വ്യാപനത്തിന്റെ പശ്ചാത്തലത്തില് ആള്ക്കൂട്ടങ്ങളുള്ള പ്രത്യക്ഷസമരങ്ങള് അവസാനിപ്പിക്കുന്നതായി യു.ഡി.എഫ് അറിയിച്ചിട്ടുണ്ട്.
