ചിറ്റാര് : നിയമപരമായ രേഖകള് സഹിതം മില്ലില് എത്തിച്ച തേക്ക് തടികള് വനപാലകര് പിടിച്ചെടുത്തു. കഴിഞ്ഞ ദിവസം വൈകിട്ട് അഞ്ച് മണിയോടെയാണ് വടശ്ശേരിക്കരയിലെ സ്വകാര്യ വ്യക്തിയുടെ പുരയിടത്തില് നിന്നും മുറിച്ചു മാറ്റിയ തേക്ക് തടികള് ഉരുപ്പടികളാക്കുവാന് ചിറ്റാറിലെ തടിമില്ലില് എത്തിച്ചത്. എന്നാല് തടി എത്തിച്ച് ചുരുങ്ങിയ സമയത്തിനുള്ളില് തന്നെ ഇവിടെ വനപാലകര് എത്തുകയും മില്ലിലെത്തിച്ച തേക്ക് തടികള് പിടിച്ചെടുത്ത് സദാ അടിക്കുകയും ആയിരുന്നു. സംഭവത്തില് മില്ലുടമയ്ക്ക് എതിരെ കേസ് രജിസ്റ്റര് ചെയ്യുകയും ചെയ്തു.
എന്നാല് തടി ആവശ്യമായ രേഖകള് സഹിതമാണ് കൊണ്ടുവന്നതെന്നാണ് ഉടമസ്ഥന്റെ വാദം. ഇതിന്റെ രേഖകള് വനപാലകരെ കാണിച്ചപ്പോള് ഇത് വ്യാജമായി നിര്മ്മിച്ചതാണെന്നായിരുന്നു വനപാലകരുടെ മറുപടി. നടപടി സ്വീകരിക്കാന് വന്ന വനപാലകരെ നാട്ടുകാര് തടഞ്ഞതിനെ തുടര്ന്ന് വാക്കേറ്റവുമുണ്ടായി. സംഭവത്തില് നീതി തേടി മുല്ലുടമ പോലീസില് പരാതി നല്കിയിട്ടുണ്ട്.
